Kơdră tĕh đak Võ Văn Thưởng pơma hơdăh, kon pơlei 2 tĕh đak Việt Nam-Cuba hơnơ̆ng mât mĭnh ƀơ̆r đon, tơgŭm băl lơ̆m dôm khei ‘năr pơmat tat mưh jang kăch mang; tơrĕk, pơlung băl tŏk klăih đơ̆ng tơdrong nol. Kơdră tĕh đak pơma hơdăh:  Đảng, Tĕh đak, kon pơlei Việt Nam chơt hơiă yoa tơdrong pơvei gĭt kăl păng jang hơdoi Việt Nam- Cuba tŏk pran ‘lơ̆ng, tôch đei yoa lơ̆m rim tơdrong. 

Kơdră tĕh đak Võ Văn Thưởng athei, kŭm hăm tơdrong pơm hơtŏk hlŏh dơ̆ng dôm tơdrong tơƀâp, pơma nuh ăn kuan tih, 2 păh athei hơtŏk dôm tơdrong jang tơbôl, jang hơdoi đơ̆ng Anih tơm vei lăng khul linh tĕh đak Việt Nam păng Cuba. Ƀât mă apŭng plenh tĕh oei đei lơ tơdrong tôch hơmơt, tơdrong pơvei jang hơdoi găh khul linh đơ̆ng 2 tĕh đak tôch gĭt kăl. Đảng, Tĕh đak Việt Nam ling lang pơjing tơdrong ‘lơ̆ng vă Anih tơm vei lăng Khul linh jang hơdoi, vang roi tơbăt, bơ̆ jang hăm Anih tơm vei lăng dôm khul linh iung tơblăh kơ kăch mang Cuba lơ̆m rim tơdrong mă 2 păh gơ̆h jang păng ‘mĕh jang hơdoi.