Dang 3jơ kem kơsơ̆ 12/7, Lêh sơng Kơdră teh đak Tô Lâm hlôi đei pơgơ̆r tih tơ̆ Hơnih ƀok Pơtao tơ̆ anih tơm Phnom Penh hăm tơdrong pơgơ̆r đơ̆ng ƀok Pơtao Nô-rô-đôm Xi-ha-mô-ni. Lăp đơ̆ng rŏng kơ Lêh sơng tơ̆ Hơnih ƀok Pơtao, Kơdră teh đak Tô Lâm hlôi đei jơ pơma dơnuh hăm ƀok Pơtao teh đak Campuchia Nô-rô-đôm Xi-ha-mô-ni.

Kŭm lơ̆m kơ sơ̆ ‘năr (12/7), Kơdră teh đak Tô Lâm hlôi pơma dơnuh hăm Kơdră Đảng Kon pơlei Campuchia, Kơdră Thượng viện Campuchia Hun Sen. 2 kơdră chĕp kơ̆l lăng ‘lơ̆ng dôm jơnei jang hơdai mă 2 păh hlôi iŏk đei lơ̆m khei ‘năr âu ki. Vă hơnhăk tơdrong pơvei 2 teh đak hơtŏk tơiung pran kơtang hloh lơ̆m jăl jang ‘nao, 2 păh drơ̆ng nơ̆r hơdrin tơlĕch jang ‘lơ̆ng dôm tơdrong drơ̆ng nơ̆r kơdră kơpal, iŏk yua ‘măng tơƀơ̆p kơdră kơpăl 2 Đảng, hơtŏk loi dơ̆ng dôm ‘măng tơƀơ̆p pơma dơnuh đơ̆ng kơdră kơpal, rim kơdră lơ̆m đĭ đăng rim tơdrong jang, mă loi ‘noh jĭ đơ̆ng kơdră chĕp kơ̆l mơlôh păng hơdruh tơdăm 2 teh đak, kŭm nhen đơ̆ng dôm kơdră chĕp kơ̆l mơlôh tơring gơlang hơtŏk tơiung; hơtŏk đei yua dôm trong jang Anih jang Hơdai Việt Nam – Campuchia găh jang hơdai mŭk drăm, joh ayŏ, khoa hŏk păng ki thuơ̆t, Hop akŏm jang hơdai păng hơtŏk tơiung dôm dêh char sơlam; hơdrin tơlĕch jang trong jang hơdai ‘nao nhen ‘Măng tơƀơ̆p đơ̆ng 3 Kơdră tơm jang tơbôl Việt Nam – Campuchia – Lào; pơih să tơƀơ̆p pơma dơnuh păng jang hơdai tơgŭm băl đơ̆ng dôm anih jang pơjing khôi luơ̆t, tơlĕch khôi luơ̆t păng tư pháp, rim khŭl jang kon pơlei păng dôm tơring 2 teh đak.

Gơmăng năr âu mơ̆n, ƀok Pơtao Nô-rô-đôm Xi-ha-mô-ni pơgơ̆r et sa tih hăm Kơdră teh đak Tô Lâm păng Khŭl tang măt gĭt kăl teh đak bơ̆n.