Kơdră teh đak pơma hơdăh ASEAN đei anih dơ̆ng tôch kơ gĭt kăl, jĭ hơnih ưh kơ gơh tơklăh hơdrô̆ lơ̆m trong jang tơgŭm tơbôl kơ Việt Nam. Kơdră teh đak chơt hơiă tơ̆ hơnăp dôm hơyak hơtŏk tơiung tôch kơ ‘lơ̆ng hơiă đơ̆ng tơdrong pơvei đơ̆ng Việt Nam păng dôm teh đak Đông Nam Á lơ̆m tơdrong jang 2 pang păng lơ pang; Việt Nam hlôi pơjing jơnei dôm tơdrong pơvei Jang hơdai gĭt kăl păng Jang hơdai tôm tơdrong hăm đĭ đăng dôm teh đak jang lơ̆m ASEAN; pơma hơdăh tơgŭm păng ‘meh vă Timor-Leste gô jăh jing teh đak jang lơ̆m khŭl tôm kơ ŭnh hnam ASEAN.

Kơdră teh đak ‘meh vă dôm Bơngai tang măt gô ling lang jing gơng tơƀưh gĭt kăl, tơgop lơ hloh dơ̆ng lơ̆m tơdrong pơtrŭt tơdrong pơvei tơbôl, jang tơbôl đơ̆ng Việt Nam păng dôm teh đak Đông Nam Á, vang tơgŭm pơjing Tơpôl ASEAN mĭnh jơ hngơ̆m đon, kơjăp, bơngai tơm kơ tơdrong rơngei, sơđơ̆ng, jang hơdai păng hơtŏk tơiung tơ̆ tơring păng apŭng plĕnh teh.