Kơdră teh đak Tô Lâm bơnê kơ Khul kơdră chĕp kơ̆l Trung ương, Teh đak, Quốc hội, Khul kơdră teh đak păng Mặt trận Lào tơiung pơjing teh đak hlôi pơtruh nơ̆r sơ ‘ngon hăm tơdrong Tổng Bí thư Nguyễn Phú Trọng lôch, vang pơgơ̆r pơdong 2 năr păng mă kăl ‘nŏh hlôi ăn Khul jang tih yoa Tổng Bí thư, Kơdră teh đak Lào chĕp kơ̆l truh pơdong, tơƀôh jơhngâm đon ‘mêm băt tôch ‘lơ̆ng, mĭnh jơ hngâm ưh đei tơplih, hơnơ̆ng yak hơdoi mă đei tơdrong hiôk chơt dăh mă tơdrong sơ ‘ngon đơ̆ng 2 Đảng, 2 teh đak păng kon pơlei 2 teh đak.

Kơdră teh đak Tô Lâm pơma hơdăh, mă iŏk jang kơchư̆k kiơ, Tổng Bí thư Nguyễn Phú Trọng hơnơ̆ng năng kăl, ‘măn tơdrong tơgŭm dêh hlŏh hăm kăch mang Lào, oei xa, bơ̆ jang ‘lơ̆ng hơiă hăm đe ƀok kơdră chĕp kơ̆l teh đak Lào, lơ̆m noh đei ƀok Thongloun Sisoulith, ling lang pơngơ̆t păng hơmet pơ ‘lơ̆ng tơdrong pơvei mĭnh ƀơ̆r đon gĭt kăl, jang hơdoi tôm tơdrong đơ̆ng Việt Nam - Lào kŭm nhen vei kơjăp tơdrong pơvei đơ̆ng 3 Đảng, 3 teh đak păng kon pơlei 3 teh đak Việt Nam - Lào - Campuchia, năng ‘nâu jĭ tơdrong tôch trŏ, tôch gĭt kăl hăm tơdrong arih, jĭ tơdrong kăl hlŏh hăm tơdrong sơđơ̆ng, hiôk hian păng jang tŏk tơ̆ rim teh đak.