Tang măt dôm bơngai tăh hla hmach thơ thâu Kơdră teh đak Tô Lâm hlôi đei Đảng, Quốc hội lui păng pôk pơjao hơnăp jang gĭt kăl ‘nao, tơƀôh jơhngơ̆m đon lăng ‘lơ̆ng dôm jơnei hơiă đơ̆ng ‘Măng hop akŏm mă 7 âu ki, ƀơ̆t Quốc hội hlôi jang đang 1 tơdrong jang tih găh tơdrong jang pơjing khôi luơ̆t, tơdrong tơchơ̆t lơ tơdrong gĭt kăl kơ teh đak. Kơdră teh đak Tô Lâm tơroi, tơdrong đei lui, pôk pơm kơchư̆k jang ‘nao ‘noh tơdrong chhôk hơiă, mă lei kŭm jing hơnăp jang tih tên, tơƀôh đon ‘meh vă gô hơnơ̆ng iŏk đei tơdrong tơgŭm, pơma dơnuh, tơgop nơ̆r đơ̆ng dôm bơngai tăh hla vă gơh jang đang hơnăp jang đơ̆ng Kơdră teh đak, jang đang hơnăp jang ‘noh jĭ bơngai tang măt kơ kon pơlei.

Tơ̆ jơ tơƀơ̆p pơma dơnuh, Kơdră teh đak pơma dơnuh hăm bơngai tăh hla găh lơ tơdrong hơdăh nhen tơdrong tơpăt, rơđăh lơ̆m tơdrong jang proh hơmet; pơm liơ vă hơtŏk ‘lơ̆ng đei yua, jơnei tơdrong jang tang găn ŭnh sa, pĭt ŭnh sa, dŏng tơgŭm dŏng sar bar; găh dôm tơdrong ưh kơ ‘lơ̆ng lơ̆m tơdrong jang vei lăng pơgang păng tơmam pơgang păng lơ tơdrong đei bơngơ̆t truh gô đei Quốc hội set hơlen, pơdrơ̆ng kiơ̆ tơ̆ ‘măng hop akŏm mă 8 truh.