Dôm bơngai tang măt vă jê̆ 500 ‘nu bơngai đei đe lui yom đei rơih iŏk đơ̆ng jơ̆p dêh char, pơlei tơm lơ̆m teh đak năm akŏm tơdrong jang pôk pơ ư bơngai hơgei ‘noh jĭ bơngai đei đe lui yom lơ̆m kon pơlei kon kông lơ̆m teh đak sơnăm 2023. Tơ̆ jơ tơƀơ̆p muh măt, lơ bơngai tang măt bơngai đei đe lui yom hơgei roi tơbăt ăn Kơdră teh đak păng tơroi hăm dôm bơngai tang măt găh dôm tơdrong jang hơdăh ‘lơ̆ng đơ̆ng kơdih tơ̆ tơpôl nhen: hŏk pơhrăm dôm tơdrong jang hơtŏk tơiung mŭk drăm păng đơ̆ng rŏng ‘noh tơroi tơbăt, tơgŭm, pơtho kon pơlei tơ̆ tơring, krao hơvơn kon pơlei hơdrin sut pơngot tơ jur dơnuh hin, hŭt lê̆ tơdrong joăt so ưh kơ ‘lơ̆ng, krao hơvơn kon pơlei pơjing tơpôl 1 jơhngơ̆m đon, pơjing grŭp tơgoăt tơgoăl đĭ đăng hơdrĕch hơdrŭng....

Chơt hơiă tơƀơ̆p muh măt dôm bơngai đei đe lui yom hơgei, Kơdră teh đak Võ Văn Thưởng pơma hơdăh, Đảng, teh đak ling lang bơngơ̆t truh, tơlĕch lơ trong jang tơgŭm vei lăng kon pơlei kơ dôm hơdrĕch kon kông, lơ̆m noh đei tơdrong jang tơm teh đak vă hơtŏk ‘lơ̆ng tơdrong arih sa kơ kon pơlei kon kông. Kơdră teh đak ‘meh vă dôm kră pơlei, bơngai pơgơ̆r pơlei hơnơ̆ng tơroi tơbăt, krao hơvơn kon pơlei kon kông vei răk, tơƀăk mong, hơtŏk kơjă kăp gĭt joh ayŏ ‘lơ̆ng hơiă, tơgop pơm hơiă atŭm đơ̆ng tơdrong đei lơ đơ̆ng joh ayŏ Việt Nam.