Pơma tơ̆ jơ pơm lêh, Kơdră tĕh đak Võ Văn Thưởng pơtruh nơ̆r hơiă hlŏh hăm kăn ƀô̆, bơngai pơtho, bơngai hŏk, bơngai jang, linh tơ̆ Hnam hŏk Khul linh vei lăng tĕh đak, atŭm hăm ‘nŏh tơchĕng ‘lơ̆ng akhan Hnam hŏk ling lang chĕp vei kơjăp tơdrong juăt, jĭ 1 lơ̆m dôm anih pơtho pơhrăm, tơchĕng hơlen khoa hŏk tơm dơnơm kơ khul linh păng kơ tĕh đak.

Kŭm hăm tơdrong pơtho, pơtâp pơhrăm, Kơdră tĕh đak athei Hnam hŏk hơnơ̆ng hơtŏk tơdrong ‘lơ̆ng mưh jang hơdoi hăm apŭng plenh tĕh găh pơtho pơhrăm; năng kăl tơdrong pơtho pơhrăm, pơtho ming dơ̆ng ăn kăn ƀô̆ tih kơ khul linh 2 tĕh đak Lào păng Campuchia. Kơdră tĕh đak lui, hăm tơdrong juăt ‘lơ̆ng hơiă lơ̆m 46 sơnăm pơjing păng jang tŏk, Hnam hŏk Khul linh vei lăng tĕh đak ưh jor gô jang đang ‘lơ̆ng tơdrong jang sơnăm hŏk 2023 -2024; atŭm hăm ‘nŏh chih hơdăh hơyak tŏk pran kơjăp kiơ̆ đơ̆ng tơdrong chih tơblang păng bơ̆ jang tơ̆ yăn âu mă khul linh păng Đảng bơ̆n hlôi tơlĕch.