Tơdrong jang “Pơyan Puih mak tơring sơlam hiôk dơnŏ jơhngâm đon kon pơlei” đei pơgơ̆r hơnơ̆ng mưh têt truh, pơyan puih mak vih. Tơdrong ‘nâu hlôi păr ang jơ̆p tơring, đei rim anih jang kơpal, khul grŭp păng lơ bơngai đơ̆ng Trung ương truh tơ̆ tơring tơrĕk truh, vang akŏm jơhngâm pơgơ̆r. Pơma tơ̆ âu, tang măt ăn kơdră chĕp kơ̆l Đảng, teh đak, Kơdră teh đak Võ Văn Thưởng pơ truh nơ̆r ‘lơ̆ng hơiă hlŏh, nơ̆r hmach thơ thou ăn đĭ đăng kăn ƀô̆, linh Ƀô đô̆i vei lăng tơring sơlam, kon pơlei dôm hơdrĕch hơdrung tơ̆ tơring sơlam, achon kông tơ̆ đak dơsĭ.

Kơdră teh đak pơma hơdăh, tơring sơlam tơ̆ jih teh đak oei đei lơ tơdrong pơmat tat, Ƀô đô̆i vei lăng tơring sơlam đei lơ trong jang ‘lơ̆ng, đei yoa, ƀĕnh jơhngâm đon ‘mêm băt jing tôch kơ juăt hăm kon pơlei tơ̆ tơring sơlam păng lơ̆m tehđak. Rim sơnăm, mưh Têt truh, pơyan puih mak vih, Tơdrong jang “Pơyan puih mak tơ̆ tơring sơlam hiôk dơnŏ jơhngâm đon kon pơlei” đei pơgơ̆r dơ̆ng tơ̆ jơp tơring sơlam, achon kông tơ̆ đak dơsĭ ‘nŏh jĭ 1 tơdrong tơƀôh hơdăh hlŏh găh tơdrong tơguăt 1 ƀơ̆r đon, găh tơdrong pơvei tôch kơjăp đơ̆ng khul linh hăm kon pơlei.