Gơmăng hei 2/11, tơ̆ Hà Nội, Ban Tuyên Giáo Trung ương păng Radio pơdăh um rup Việt Nam pơgơ̆r Tơƀâp pơma nuh hăm dôm bơngai jang rơgei lơ̆m tĕh đak 2023 găh "Ƀok Hô – Trong yak hơpơi ‘mĕh 2023" hăm hơnăn: Đon lui păng tơdỏng hơpơi ‘mĕh. Tơdrong ‘nâu đei pơgơ̆r hơnơ̆ng rim sơnăm vă pôk pơ ư, pơlung rim khul grŭp, rim bơngai jang rơgei mưh hŏk pơhrăm păng jang kiơ̆ jơhngâm đon ‘lơ̆ng đơ̆ng Ƀok Hô.

Hăm hơnăn Đon lui păng hơpơi ‘mĕh, Tơdrong pơma nuh Ƀok Hô – Trong yak hơpơi ‘mĕh 2023 tơƀôh hơdăh đon lui, tơ̆k hơdăh đon tơchĕng ‘lơ̆ng, trong jang kăch mang mă Đảng, Ƀok Hô păng đĭ đăng kon pơlei bơ̆n chă rơih. Tơ̆ âu, Kơdră tĕh đak Võ Văn Thưởng păng Kơdră chĕp kơ̆l Ban Tuyên giáo Trung ương Nguyễn Trọng Nghĩa hlôi hơpăh pơkao păng tơmam ăn dôm bơngai jang rơgei vang truh akŏm.