Pơma tơ̆ jơ bơ̆ jang, Kơdră tĕh đak Võ Văn Thưởng pơma hơdăh, Quân khu 2 jĭ tơring xă, đei anih oei tôch gĭt kăl kơna hơnăp jang, tơdrong jang đơ̆ng khul linh tơblăh tơ̆ Quân khu 2 tôch gĭt kăl, trăp trĭn, mă loi ƀât mă tơdrong lơ̆m apŭng plenh tĕh, tơ̆ tơring oei tơplĭh tôch krê, kơtă lơ̆m tĕh đak kŭm đei lơ tơdrong krê ưh gơ̆h băt hơdrol.

Drơ̆ng nơ̆r hăm dôm tơdrong jang tơm mă quân khu chih hơdăh lơ̆m 6 khei hơtuch sơnăm, Kơdră tĕh đak Võ Văn Thưởng athei, tơ̆ hơnăp kơnh, dôm anih jang, khul linh lơ̆m Quân khu 2 hơnơ̆ng băt hơdăh, tơblang hơlen rim tơdrong păng tơdra hơdrol mă trŏ, mă loi jĭ dôm tơdrong ƀơm truh tơdrong sơđơ̆ng tĕh đak; kơchăng, tơtom roi tơƀôh ăn Đảng, Teh đak, Quân ủy Trung ương păng Anih tơm vei lăng khul linh vă gơ̆h đei trong jang lăp ‘lơ̆ng, ưh gơ̆h lê̆ đei tơdrong ưh ê; vei kơjăp ‘lơ̆ng tơring sơlam tĕh đak, tơdrong pơm tơm, kơjăp ‘lơ̆ng kơ tĕh đak.