Truh ngôi, pơma nơ̆r hơiă hăm Ƀok chuơ Thích Trí Quảng, ƀok pơgơ̆r Khul lui Phât Việt Nam tơ̆ Hnam chuơ Huê Nghiêm, Kơdră tĕh đak Võ Văn Thưởng pơtruh nơ̆r ‘lơ̆ng hơiă hlŏh hăm Ƀok chuơ; hmach thơ thou ăn Khul lui kŭm hăm đĭ đăng bơngai, kon pơlei Lui phât lơ̆m păng ‘ngoăih kơ tĕh đak sơng 1 pơyan Phât đản sơđơ̆ng ‘lơ̆ng, hiôk chơt.

Kơdră tĕh đak pơma hơdăh, trong jang ưh đei tơplih đơ̆ng Đảng, tĕh đak ling lang năng kăl păng vei lăng ‘lơ̆ng tơdrong chă lui khop mơ̆ng kơ vă đơ̆ng kon pơlei, tơrĕk păng pơjing tơdrong ‘lơ̆ng ăn dôm khul lui pơgơ̆r hơkŭm, krao khan kiơ̆ tơdrong hơgăt đơ̆ng Khôi luơ̆t tơm păng luơ̆t tĕh đak dang ei;

Kơdră tĕh đak pơma hơdăh, Đảng, tĕh đak păng Mặt trận Tổ quốc Việt Nam lui păng hơpơi ‘mĕh, hăm hơnăp jang đơ̆ng bơngai chĕp kơ̆l pơgơ̆r Khul lui phât, ƀok Chuơ Thích Trí Quảng kŭm hăm đĭ đăng bơngai pơtho, vei lăng lui phât đei 1 jăl jang ‘nao hăm lơ tơdrong jơnei; atŭm hăm ‘nŏh pơtho ăn bơngai lui phât Việt Nam hơnơ̆ng bơ̆ jang kiơ̆ trong “Tơdrong lui – Hơdrĕch hơdrung - Chủ nghĩa xã hội”, tơgop ăn tơdrong tơiung pơjing păng vei lăng tĕh đak.