Pơma tơ̆ jơ tơƀâp, Ƀok soi tơm Giuse Nguyễn Chí Linh, vei lăng Hnam khop tơm Huế bơnê păng tơƀôh đon hơiă đei sơng Kơdră teh đak păng khul jang truh ngôi tơ̆ Hnam khop tơm Huế, pơtruh nơ̆r hơiă pơyan Noel ăn kon pơlei lui công giáo tơ̆ Hnam khop tơm Huế.

Ƀok soi tơm Giuse Nguyễn Chí Linh tơchĕng ‘lơ̆ng tơdrong jơnei tôch hơiă đơ̆ng dôm ‘măng năm hơpong, bơ̆ jang tơ̆ teh đak đe đơ̆ng Kơdră teh đak Võ Văn Thưởng lơ̆m sơnăm 2023; dơ̆ng tang ăn teh đak Việt Nam tơƀâp, bơ̆ jang hăm kơ dră chĕp kơ̆l lơ teh đak tih; tơgop gĭt kăl vang pơm hơtŏk anih dơ̆ng đơ̆ng Việt Nam lơ̆m apŭng plenh teh.

“Hơdrô̆ hăm kon pơlei lui Công giáo Việt Nam, ‘măng năm hơpong tơ̆ Vatican păng tơƀâp Ƀok Papa Francis đơ̆ng Kơdră teh đak Võ Văn Thưởng ‘nŏh jĭ 1 tơdrong tôch ‘lơ̆ng hơiă păng ƀĕnh tơdrong hơmĕng. Mă loi, kon pơlei lui công giáo tơ̆ Huế gơnơm ‘măng năm hơpong âu roi hơiă hlŏh dơ̆ng mưh đe sư tơchĕng, rŏ năng 1 năr yơ ‘nŏh ưh kơ đunh đe sư đei sơng Ƀok Papa Francis tơ̆ groi teh yang La Vang. Hăm kơdih kâu inh, ‘ngoăih kơ đon lui kơpal, inh tôch lăp đon găh tơdrong pơvei đơ̆ng dôm anih jang kơpal lơ̆m tơpôl păng kon pơlei lui Công giáo roi đunh roi ‘lơ̆ng, roi đunh roi mât 1 jơhngâm, roi đunh roi ‘mêm băl”.

Hơiă mưh năm ngôi tơ̆ Hnam khop tơm Huế ƀât vă jê̆ truh năr Noel, Kơdră teh đak Võ Văn Thưởng pơtruh nơ̆r ‘lơ̆ng hơiă đơ̆ng Kơdră chĕp kơ̆l Đảng, teh đak ăn Ƀok soi tơm Giuse Nguyễn Chí Linh, Ƀok soi vei lăng Hnam khop tơm Huế; kŭm hăm đe ƀok soi, yă giĕng păng kon pơlei lui công giáo tơ̆ Hnam khop tơm Huế sơng 1 pơyan Noel sơđơ̆ng ‘lơ̆ng, hiôk chơt.

Tơroi găh tơdrong lơ̆m teh đak, Kơdră teh đak ăn tơbăt, sơnăm 2023 teh đak jang đei lơ tơdrong jơnei, đei apŭng plenh tĕh tơchĕng ‘lơ̆ng, lơ̆m nŏh đei tơdrong tơgop gĭt kăl đơ̆ng tơpôl kon pơlei lui công giáo lơ̆m teh đak. Hăm nơ̆r pơtho “Arih xa ‘lơ̆ng kiơ̆ nơ̆r ƀă yang pơtho vă pơvih ăn kon pơlei", bơngai lui Công giáo adrin vang jang lơ̆m dôm tơdrong pơjei băl ‘mêm kơ teh đak yoa MTTQ Việt Nam păng dôm khul grŭp tơpôl tơlĕch; mă loi jĭ tơdrong jang tơgŭm lơ̆m tơpôl, bơ̆ jang tơgŭm dŏng, jang pơgang, pơtho pơhrăm, hơnhăk jơhngâm đon ‘mêm kơ eng, pơvih ăn kon pơlei mă loi hăm dôm bơngai ưh pŭn ai lơ̆m tơpôl nhen đe hơiŏh tơnuh, ưh đei anih oei xa, bơngai vei rong; bơngai kră arih xa hơdrô̆, bơngai jĭ jăn păn hnong, bơngai jĭ HIV/AIDS,...  

Kơdră teh đak Võ Văn Thưởng oei kĭ Kơthơ krao ƀok Papa Francis năm ngôi tơ̆ teh đak Việt Nam; hơpơi ‘mĕh kon pơlei lui Công giáo Việt Nam vang jang hơdoi hăm dôm anih jang kơ teh đak vă jăh sơng đei ƀok Papa truh hơpong ngôi.

“Inh ƀlŏk lơ̆m kơthơ đơ̆ng Ƀok Papa Francis gơih ăn kon pơlei lui Công giáo Việt Nam đơ̆ng rŏng kơ inh năm hơpong tơ̆ Hnam khop tih, tơƀâp ƀok Papa, đei 1 nơ̆r, jơhngâm ‘mêm kơ ƀă yang păng jơhngâm ‘mêm băl đơ̆ng kon bơngai jĭ 2 păh măt jên. Păng inh kŭm ƀlŏk, lơ̆m Hla ar Ƀă yang đei nơ̆r, pơvih ăn kon pơlei bơ̆n ‘nŏh jĭ 1 trong vă pơvih ăn Ƀă yang. Inh ƀôh kon pơlei lui Công giáo tơ̆ Hnam khop tơm Huế khei ‘năr âu ki bơ̆ jang tôch ‘lơ̆ng tơdrong lui yom kơ ƀă yang, ‘mêm kơ kon pơlei, kiơ̆ đơ̆ng noh tơgop pơm hơtŏk tơdrong jang mŭk drăm tơpôl tơ̆ tơring, lơ̆m teh đak, tơgop pơm ăn tơdrong arih xa kơ kon pơlei roi đunh roi ‘lơ̆ng”. 

Kơdră teh đak Võ Văn Thưởng pơma hơdăh, tơ̆ Hop akŏm ‘măng mă 8, Khul kơdră chĕp kơ̆l Trung ương hlôi tơlĕch tơdrong Tơchơ̆t hơnơ̆ng tưk tơiung tơdrong ‘lơ̆ng, jơhngâm pran đơ̆ng mât mĭnh ƀơ̆r đon đĭ đăng hơdrĕch hơdrung, pơjing teh đak bơ̆n roi đunh roi pơdrŏng, hơnŭk hơnoa, hiôk chơt. Tơdrong tơchơ̆t chih hơdăh, tơguăt đĭ đăng hơdrĕch hơdrung ‘nŏh jĭ tơdrong juăt tôch kăp gĭt đơ̆ng hơdrĕch Việt Nam; ‘nŏh jĭ trong jang đunh đai, gĭt kăl đơ̆ng Đảng, jĭ tơm a pơjing đei jơhngâm pran hơdrĕch hơdrung. Kơdră teh đak akhan, ‘mĕh thoi noh athei đei tơdrong mât 1 ƀơ̆r đon đơ̆ng kon pơlei, tơguăt băl đơ̆ng bơngai kiơ̆ lui khop păng bơngai ưh đei kiơ̆ lui khop, đơ̆ng bơngai lui ‘nâu hăm bơngai lui to; tơguăt băl đơ̆ng bơngai Việt Nam lơ̆m teh đak păng bơngai Việt Nam tơ̆ teh đak đe. Kiơ̆ jơhngâm đon ‘nŏh, Kơdră teh đak hơpơi ‘mĕh, hăm hơnăp jang đơ̆ng Ƀok soi vei lăng Hnam khop tơm Huế, Ƀok soi tơm Giuse Nguyễn Chí Linh hơnơ̆ng pơtho tơƀôh, pơlung kon pơlei lui Công giáo tơ̆ Huế tưk tơiung jơhngâm đon Lui kơ Ƀă yang, ‘mêm kơ teh đak; ‘Mêm kơ ƀă yang păng ‘mêm kơ kon pơlei vă roi đunh roi đei lơ hlŏh dơ̆ng tơdrong jang ‘lơ̆ng, arih xa ‘lơ̆ng, lui kơjăp; vang pơjing teh đak roi đunh roi pơdrŏng hơnŭk hơnoa păng hiôk chơt.