Tơ̆ San Francisco, Mi, lơ̆m pơgơ̆r Giĕng lêh kơdră kơpal APEC hlôi pơgơ̆r ‘măng tơƀơ̆p dôm kơdră chĕp kơ̆l tih ‘Măng hop akŏm jang hơdai mŭk drăm Ấn Độ Dương – Thái Bình Dương yua kơ hơnŭk hơnoa hiôk hian. Kơdră teh đak Võ Văn Thưởng chĕp kơ̆l Khŭl tang măt gĭt kăl Việt Nam vang truh jơ tơƀơ̆p păng đei ƀai iung pơma, tơroi nơ̆r pơma găh pơtrŭt jang hơdai Ấn Độ Dương-Thái Bình Dương.

Iung pơma tơ̆ Jơ tơƀơ̆p, Kơdră teh đak Võ Văn Thưởng pơma hơdăh, ‘măng hop akŏm jang hơdai mŭk drăm Ấn Độ Dương – Thái Bình Dương yua kơ tơdrong hơnŭk hơnoa ‘noh jĭ hơdrin atŭm vă hơtŏk loi dơ̆ng jang hơdai đơ̆ng mŭk drăm lơ̆m tơdrong apŭng plĕnh teh tơjră hăm lơ tơdrong tơplih, tơdrong hiôk păng long nol hơlam băl. ‘Măng hop akŏm jang hơdai mŭk drăm Ấn Độ Dương – Thái Bình Dương yua kơ tơdrong hơnŭk hơnoa đei hơmĕng ‘noh jĭ tơdrong jang hơdai, tơgoăt mŭk drăm ‘lơ̆ng, đei yua, hơnhăk ăn đei yua ‘lơ̆ng tơ pă ăn kon pơlei, tơgop ăn tơdrong rơngei, sơđơ̆ng păng hơnŭk hơnoa kơ tơring păng jơ̆p plĕnh teh.