Pơtơm năm dăr lăng tơ̆ Dur Hoàng thành Thăng Long, Kơdră teh đak Võ Văn Thưởng kŭm hăm Kơdră tơm teh đak Philippines Marcos truh hăm tơdrong jang “Happy Tết 2024” pơgơ̆r tơ̆ Hnam ƀok Pơtao Hoàng Thành Thăng Long. Tơ̆ âu, Kơdră teh đak roi tơbăt ăn Kơdră tơm Philippines găh năr Tết so kơ Việt Nam hăm lơ tơdrong juăt tôch ‘lơ̆ng, mât hơdai hăm năr Tết Việt, dôm kơjă kăp gĭt đơ̆ng joh ayŏ kơ dŏ xoang so, dôm tơdrong pơm ngôi kră sơ̆ lơ̆m năr Tết; dôm tơmam xa, kơthao pơdă tơmam Tết; lăng ngôi tơdrong hơri hơxoang ƀĕnh um ai ‘lơ̆ng hơiă kơ hơdrĕch hơdrung.

Đơ̆ng rŏng kơ ‘nŏh, Kơdră teh đak Võ Văn Thưởng kŭm hăm Kơdră tơm Philippines Marcos truh lăng tơ̆ lơ anih gru groa so lơ̆m Hoàng thành Thăng Long. Pơtôch ‘măng năm hơpong, khul vang phĭn hơdai ƀât Anih Rồng Điện Kính Thiên, jing 1 lơ̆m dôm tơdrong tôch hơiă ăn ‘măng năm hơpong tơ̆ teh đak Việt Nam ‘măng mă âu đơ̆ng Kơdră tơm Philippines Marcos.