‘Nâu jĭ ‘măng năm hơpong tơ̆ tĕh đak Áo mă blŭng đơ̆ng Kơdră tĕh đak Việt Nam lơ̆m 15 sơnăm âu ki păng jing tơdrong pơgơ̆r pơma nuh ăn khul jang tih kơ tĕh đak mă blŭng đơ̆ng Việt Nam hăm Italy păng Vatican lơ̆m 7 sơnăm âu ki, kŭm jing tơdrong gĭt kăl hlŏh ƀlep ƀât tơbăt 50 sơnăm pơjing tơdrong pơvei jang tơbôl păng 10 sơnăm pơjing tơdrong pơvei jang hơdoi gĭt kăl Việt Nam-Italy.

Kơsơ̆ ‘năr 23/7, kiơ̆ jơ tơ̆ tơring, đơ̆ng rŏng kơ truh tơ̆ Anih tơm Vienna, Kơdră tĕh đak Võ Văn Thưởng tơƀâp bơngai tang măt ăn tĕh đak Việt Nam tơ̆ Áo păng 6 ‘nu Bơngai tang măt ăn Việt Nam tơ̆ dôm tĕh đak EU đei trong sơlam atŭm hăm tĕh đak Áo ‘nŏh: Đức, Bỉ, Séc, Thụy Sỹ, Hungari păng Slovakia. ‘Nâu jĭ tơdrong jang mă blŭng lơ̆m ‘măng năm hơpong tơ̆ tĕh đak Áo đơ̆ng Kơdră tĕh đak bơ̆n. Đơ̆ng rŏng kơ ‘nŏh, Kơdră tĕh đak Võ Văn Thưởng sơng ƀok Alfred Gerstl, Kơdră Khul jang tơbôl Áo-Việt Nam păng dôm kuan tih tĕh đak Áo nai hai.