Ƀlep ƀât sơnăm ‘nao Giáp Thìn 2024, tang măt ăn kơdră chĕp kơ̆l Đảng, teh đak, Kơdră teh đak Võ Văn Thưởng pơtruh nơ̆r ăn đĭ đăng kơdră chĕp kơ̆l, ƀok yŏng, kăn ƀô̆, linh, công nhân bơngai jang lơ̆m Grŭp jang nơ̆r hmach thơ thou sơnăm ‘nao ‘lơ̆ng hơiă hlŏh.

Tơ̆ jơ bơ̆ jang, Kơdră teh đak tơchĕng akhan, đơ̆ng rŏng vă jê̆ 35 sơnăm pơjing păng jang tŏk, khul kăn ƀô̆ công nhân, bơngai jang tơ̆ Viettel ling lang chĕp vei đon tơnăp, adrin jang tok, pơ̆n iŏk jang dôm tơdrong jang pơmat tat. “Grŭp jang gơ̆h hưch hanh mưh pơma truh Khul linh Viettel, jơhngâm đon Viettel, đon adrin Viettel”, Kơdră teh đak tơchĕng ‘lơ̆ng akhan, đơ̆ng dôm tơdrong pơmat tat, pơlong nol ‘nŏh mă hlôi pơjing đei Viettel hrei ‘nâu.

Kơdră teh đak athei, hăm hơnăp jang đơ̆ng anih jang xa kơ Khul linh, đơ̆ng Ƀô đô̆i Ƀok Hô, Grŭp jang athei vei kơjăp jơhngâm iung jang, kơchăng sơng iŏk păng bơ̆ jang đang ‘lơ̆ng rim tơdrong đei pơjao kiơ̆ jơhngâm đon hlôh vao kơjăp găh jang mŭk drăm hơdai hăm vei lăng sơđơ̆ng teh đak. Hơdrô̆ hăm Viettel, kŭm hăm jang mŭk drăm, Grŭp jang athei jang ‘lơ̆ng tơdrong jang tơbôl kơ teh đak hai.