Pơtruh nơ̆r thơ thou hơiă hlŏh ăn khul y, ƀak si ƀlep ƀât năr Ƀok thây pơgang Việt Nam, Kơdră teh đak Võ Văn Thưởng pơma hơdăh, tơdrong jang pơgang jĭ tơdrong jang tôch kăp gĭt, vei lăng năng tông jơhngâm pran ăn kon pơlei păng hơnhăk ăn rim unh hnam, tơpôl ƀĕnh tơdrong ‘lơ̆ng.

Kơdră teh đak hơpơi ‘mĕh đe y, ƀak si Hnam pơgang Nhi đồng 1 tưk tơiung tôch ai dôm tơdrong jơnei iŏk đei lơ̆m khei ‘năr âu ki; atŭm hăm ‘nŏh adrin, hơnơ̆ng jang đei dôm tơdrong jơnei plơ̆ng dơ̆ng kơlih yoa tơdrong jơnei lai yơ kŭm tơlĕch hloi tơdrong nol ‘nao vă gơ̆h yak hlŏh, athei đei đon adrin ưh pơdơ̆h ‘mơ̆i.

Kơdră teh đak tơtă ăn đe kơdră chĕp kơ̆l plt, dôm anih jang kơpal hơnơ̆ng tơrek truh, pơm hơtŏk tơdrong arih ăn đe y, ƀak si, bơngai jang pơgang; hơnơ̆ng hơmet pơ ‘lơ̆ng anih jang, kơmăy kơmŏk pơyoa ăn jang pơgang; năng kăl truh tơdrong pơtho ăn khul ƀak si pơtăl dơ̆ng, ăn đe ƀak si mơlôh năm tơ̆ dôm teh đak đei tơdrong jang pơgang rơgei vă pơm hơtŏk tơdrong jơnei, tưk tơiung tơdrong ‘lơ̆ng đơ̆ng Hnam pơgang tơ̆ hơnăp kơnh.