Pơma hơdăh jơhnơr arih tôch kơ ‘nă hal đơ̆ng ƀô̆ đô̆i Đặc công đơ̆ng rŏng 56 sơnăm pơjing, iung jang păng jang đei, Kơdră teh đak pơma hơdăh, rim jơhnơr kang ƀô̆, khŭl lĭnh đặc công hlôi pơjing đei dôm jơnei gĭt kăl hloh, vang hơdai lơ̆m teh đak jang đang tơdrong jang iung tơblăh iŏk rơngei hơdrĕch hơdrŭng, rơngei teh đak.

Lơ̆m khei ‘năr hrei ‘nâu,  Binh chủng hlôi jang ‘lơ̆ng tơdrong jang tơgŭm, tơlĕch ăn hăm Quân ủy Trung ương, Anih tơm vei lăng khŭl lĭnh pơjing păng hơtŏk tơiung rim khŭl lĭnh đặc công kiơ̆ trong hơbĕch hơbal, pran; bơ̆jang kiơ̆ ‘lơ̆ng tơdrong jang đặc công - anih jang tơm tơdrong jang tơjră pơm kơnê̆ lơ̆m khŭl lĭnh. Kơdră teh đak athei kăl kơ pơjing khŭl lĭnh Đặc công Việt Nam mă hơgei găh chĭnh trĭ; đei đon nuih chĭnh trĭ gĭt kăl kơjăp, đei đon hơdrin mă ‘lơ̆ng; jĭ khŭl lĭnh iung tơblăh đei lui ngeh gĭt kăl, mĭnh jơhngơ̆m đon hăm Đảng, hăm teh đak păng kon pơlei.