Ƀok Phạm Văn Tịch rơneh sơnăm 1952 tơ̆ Quảng Nam, lơ̆m 1 ŭnh hnam ‘mêm kơ teh đak. Đơ̆ng ‘lơ̆p, sư hlôi hrôih đei băt păng vang jang dôm tơdrong jang tơgŭm ƀô̆ đô̆i. Sơnăm 1967, lơ̆m 1 ‘măng đôh ƀom, sư đei jĭ rơka ăl păng kăt 2 păh jơ̆ng, đơ̆ng rŏng ‘noh pŭn ai tơƀơ̆p 1 grŭp ƀak si ba năm tơ̆ teh đak Mi hơmet. Jĭ bơngai đei jơhngơ̆m hơdrin pran kơtang, sư hlôi hŏk pơhrăm, lĕch ‘măng khoă hŏk păng jing bơngai joăt jang găh tơdrong jang khoa hŏk kơmăy tĭnh tơ̆ hnam trưng đại học Berkeley, California.

Kơdră teh đak ‘meh vă akhan dôm jơhnơr kon pơlei đơ̆ng teh đak bơ̆n oei tơ̆ teh đak đe hơnơ̆ng hơtŏk jơhngơ̆m đon ‘mêm kơ teh đak, kơchăng roi tơbăt vă tơpôl kon pơlei bơ̆n tơ̆ teh đak Mi, hlôh hơdăh hloh găh tơdrong teh đak păng trong jang tơgoăt tơgoăl hơdrĕch hơdrŭng đơ̆ng Đảng păng Teh đak bơ̆n. Kơdră teh đak ‘meh vă tơpôl bơngai Việt tơ̆ Mi ưh kơ pơdơh tơgoăt tơgoăl, pơm kiơ̆ khôi luơ̆t păng hơnơ̆ng tơgop lơ̆m tơdrong hơtŏk tơiung kơ Mi, tơdrong pơvei 2 pang 2 teh đak, kŭm nhen tơdrong jang vei lăng, pơjing păng hơtŏk tơiung pơlei pơla Việt Nam.