Lơ̆m ‘măng năm ngôi, bơ̆jang tơ̆ Việt Nam đơ̆ng Kơdră tơm teh đak Kazakhstan, pơgê 22/8, Kơdră teh đak Võ Văn Thưởng păng Kơdră tơm teh đak Kazakhstan hlôi vang chă hơlen lăng găh 1,2 tơdrong joh ayŏ ‘lơ̆ng hơiă kơ Việt Nam kiơ̆ đơ̆ng tơdrong jang pơm bơ̆n ƀô̆i, klĭnh joăt joe tơ̆ plei pơm bô̆i plĭnh Chu Đậu, apŭng Nam Sách, dêh char Hải Dương. Kiơ̆ tơroi đơ̆ng Kơdră tơm teh đak Kazakhstan, ƀok hlôi ‘măn jơ năr vă chă hơlen lăng joh ayŏ Việt Nam păng đei băt dôm tơmam bô̆i klĭnh âu hlôi đei đơ̆ng kơ hrĕng sơnăm hơdrol sơ̆, tơƀôh dôm tơdrong joh ayŏ ‘lơ̆ng hơiă, tơroi tơdrong arih sa kŭm nhen kơjă kăp gĭt ‘lơ̆ng kơ bơngai Việt. 

Ƀok Võ Văn Thưởng păng Kơdră tơm teh đak Kazakhstan vang chă hơlen lăng găh plei jang tơdrong jang so sơ̆ đei ư nhang groi teh tơring păh tu ‘moi kiơ̆ tơdrong pơm ƀô̆i, tơƀôh jơhngơ̆m ‘meh vă tơring păng dôm bơngai pơm jang gô hơnơ̆ng tơklep, chĕp vei păng tơƀăk mong dôm kơjă kăp gĭt mă plei tơdrong jang tŏk bŏk đei yua đơ̆ng bô̆i klĭnh Chu Đậu kŭm jing pơtih ăn tơdrong hơiă bô̆i Việt, pơtih ăn tơdrong hơgei tơring tơmăn đak krong Hồng.