Năng dơ̆ng jăl trong hlŏh 30 sơnăm 2 tĕh đak pơjing tơdrong pơvei, jang tơbôl, Kơdră tĕh đak pơma hơdăh, Việt Nam păng Kazakhstan đei tôm tơdrong kăl vă gơ̆h jing dôm bơngai boăl juăt ‘lơ̆ng lơ̆m chăl jang tŏk ‘nao. Pơma lơ̆m jơ et xa, Kơdră tĕh đak Võ Văn Thưởng akhan, 2 tĕh đak tôch hưch hanh hăm tơdrong pơvei tơguăt 1 ƀơ̆r đon, jang hơdoi kơjăp 2 pang đei hơmet pơ ‘lơ̆ng hơnơ̆ng, roi đunh roi kơjăp păng tŏk pran ‘lơ̆ng.

Hăm lơ tơdrong đei pơgơ̆r lơ̆m ‘măng năm hơpong, kơdră chĕp kơ̆l 2 tĕh đak hlôi drơ̆ng nơ̆r hăm dôm trong jang gĭt kăl vă pơm hơtŏk tơdrong jang hơdoi đơ̆ng 2 tĕh đak, Kơdră tĕh đak lui, hăm đon adrin păng nơ̆r pơtho tơƀôh, chĕp kơ̆l pơgơ̆r tôch kơjăp đơ̆ng Kơdră chĕp kơ̆l 2 tĕh đak, dôm hla ar chih găh tơdrong jang hơdoi păng drơ̆ng nơ̆r iŏk đei lơ̆m ‘măng năm hơpong âu gô đei 2 păh tơlĕch jang đei yoa ‘lơ̆ng, hơnhăk tơdrong jang hơdoi đơ̆ng Việt Nam păng Kazakhstan roi đunh tŏk roi pran ‘lơ̆ng.