Tơ̆ jơ pơma, lơ̆m tơdrong tơbôl, ‘mêm păng lui ngeh, Kơdră teh đak Võ Văn Thưởng păng Thủ tướng Kishida tơroi dơ̆ng tơdrong pơvei 2 teh đak lơ̆m 50 sơnăm âu ki păng tơƀôh đon lăp găh tơdrong hơtŏk tơiung pran kơtang, tôm tơdrong, tơpă lơ̆m đĭ đăng dôm tơdrong jang đơ̆ng tơdrong pơvei 2 teh đak.

Kiơ̆ lơ̆m tơdrong pơvei ‘nao, 2 kơdră chĕp kơ̆l hlôi drơ̆ng nơ̆r găh trong jang tih păng dôm trong jang vă pơm ‘lơ̆ng jang hơdai 2 teh đak, hơnơ̆ng tơlĕch jang đei yua dôm trong jang pơma dơnuh jang hơdai hlôi đei đơ̆ng dôm anih tơm, anih jang 2 teh đak păng pơtrŭt pơjing dôm trong jang hơdai ‘nao; hơtŏk loi dơ̆ng jang hơdai tơpă, đei yua lơ̆m tơdrong jang khŭl lĭnh kiơ̆ lơ̆m Tơdrong tơchơ̆t trĕng lăng atŭm găh jang hơdai khŭl lĭnh Việt Nam - Nhật Bản. Găh jang hơdai mŭk drăm, 2 kơdră chĕp kơ̆l drơ̆ng nơ̆r hơnơ̆ng hơtŏk loi dơ̆ng jang hơdai mŭk drăm đơ̆ng 2 teh đak, pơtrŭt jang hơdai vă vei sơđơ̆ng mŭk drăm păng pơih să jang hơdai lơ̆m dôm tơdrong jang ‘nao nhen tơplih ‘nao pơcheh hơgei, pơtho pơjao kơmăy kơmŏk, tơplih kơsô̆, tơplih rơgoh.