Lơ̆m ‘măng năm hơpong, Thủ tướng Nhật Bản Kishida Fumio păng hơkăn sư vang pơgơ̆r lêh sơng păng et xa hơdai hăm Kơdră teh đak Võ Văn Thưởng păng hơkăn ƀok. 2 ‘nu kơdră chĕp kơ̆l Khul tang măt ăn 2 teh đak pơma đam, hơlen năng dôm tơdrong jơnei iŏk đei lơ̆m 50 sơnăm pơjing tơdrong pơvei jang tơbôl păng tơlĕch lơ trong jang hơdoi pran hlŏh dơ̆ng tơ̆ hơnăp kơnh.

Đơ̆ng rŏng kơ pơma đam, 2 ‘nu Kơdră chĕp kơ̆l kŭm tơlĕch nơ̆r Tơchơ̆t atŭm găh hơtŏk tơdrong pơvei Việt Nam - Nhật Bản tŏk jing Tơdrong pơvei git kăl, jang hơdoi tôm tơdrong yoa tơdrong rơngei păng hơnŭk hơnoa tơ̆ Châu Á păng lơ̆m apŭng plenh tĕh; vang dơ̆ng lăng tơdrong kĭ pơkăp lơ hla ar jang hơdoi đơ̆ng dôm anih tơm, anih jang kơpal kơ 2 teh đak.

Kơdră teh đak đei dôm ‘măng tơƀâp pơma nuh hăm Kơdră Thượng viện, Kơdră Hạ viện Nhật Bản. Mă loi ‘nŏh, Kơdră teh đak hlôi năm ngôi păng iung pơma tơ̆ Quốc hội Nhật Bản, anih chih pơjing luơ̆t đunh hlŏh tơ̆ châu Á...