Lơ̆m dôm tơdrong đei pơgơ̆r tơ̆ giĕng lêh tih APEC 2023, Kơdră teh đak Võ Văn Thưởng vă kŭm hăm dôm Kơdră chĕp kơ̆l dôm teh đak APEC pơma nuh găh dôm tơdrong gĭt kăl ƀơm truh mŭk drăm apŭng plenh tĕh păng tơring; tơlĕch lơ trong jang hơdoi găh tĕch mơdro, tơmât jên jang, jang khoa hŏk kơmăy kơmŏk, tơplih ‘nao rơgei păng lơ tơdrong nai hai.

Việt Nam vă kŭm hăm dôm teh đak hơtŏk đon pơma nuh, tơiung pơjing, jang tơnăp, năng kăl trong jang lơ pang, vang jang hơdoi yoa tơdrong jang tŏk pran kơjăp păng hơnŭk hơnoa tơ̆ tơring. Kơdră teh đak Võ Văn Thưởng oei vă vang akŏm păng pơma tơ̆ Hop akŏm tih kơ anih tĕch mơdro, vang truh hăm dôm ‘măng pơma nuh đơ̆ng Kơdră chĕp kơ̆l dôm teh đak APEC hăm anih jang hơdoi, bơngai tang măt; truh Hop akŏm tih lơ̆m Trong jang mŭk drăm Ấn Độ Dương – Thái Bình Dương.