Tơ̆ jơ tơƀâp, Kơdră teh đak Võ Văn Thưởng hơiă hăm Bơngai tang măt hlôi jang đang ‘lơ̆ng tơdrong jang đei pơjao lơ̆m jăl jang tơ̆ Việt Nam; tơchĕng ‘lơ̆ng dôm tơdrong tơgop tôch đei yoa đơ̆ng Bơngai tang măt lơ̆m tơdrong pơm pơ ‘lơ̆ng hlŏh dơ̆ng tơdrong pơvei păng jang hơdoi Việt Nam-Pakistan khei ‘năr âu ki, mă loi jĭ tơdrong jang hơdoi găh lơ tơdrong kăl ƀlep ƀât 2 teh đak tơbăt 50 sơnăm năr pơjing tơdrong pơvei jang tơbôl lơ̆m sơnăm 2022.

Kơdră teh đak athei 2 păh hơtŏk tơdrong ăn khul grŭp jang tih tơ̆ anih tơm, tơring tơrang, khul tĕch mơdro, jang xa, pơgơ̆r tơƀâp ăn kon pơlei păng khul ngĭ si jang tơbôl vă hơtŏk đon hlôh vao băl, hơmet kơjăp tơdrong pơvei Việt Nam-Pakistan. 2 păh athei adrin bơ̆ jang đei yoa ‘lơ̆ng hlŏh dơ̆ng tơdrong jang hơdoi găh tĕch mơdro, tơmât jên jang, pơm hơtŏk kơsô̆ jên tĕch mơdro đơ̆ng 2 pang.