Tơ̆ jơ sơng Kơdră Grŭp jang Huawei Lương Hoa, Kơdră teh đak Võ Văn Thưởng pơma hơdăh, tơdrong tơplih kơsô̆ păng hơtŏk tơiung mŭk drăm kơsô̆ lơ̆m apŭng plĕnh teh hơtŏk tơiung tôch kơ hrĕnh. Việt Nam tôch kơ lăng kăl păng akŏm tơplih kơ sô̆, pơjing mŭk drăm kơ sô̆ păng tơpôl kơsô̆. Việt Nam krao hơvơn tơdrong jang hơdai đơ̆ng dôm pang, đơ̆ng Khŭl kơdră teh đak klĕp truh rim bơngai tơgŭm, jang hơdai, tơmơ̆t jên jang lơ̆m ming man anih jang kăl kơ sô̆, jang đang trong jang pơtrŭt hơtŏk tơiung mŭk drăm kơsô̆.

Sơng ƀok Lý Tự Học - Kơdră Jơnŭm vei lăng Grŭp jang Trung Hưng (ZTE), Kơdră teh đak Võ Văn Thưởng lăng ‘lơ̆ng jơnei tĕch mơdro đơ̆ng ZTE păng iŏk yua jang hơdai pơm tơlĕch tĕch mơdro đơ̆ng ZTE tơ̆ Việt Nam, jĭ tơmoi răt tơmam, anih jang hơdai tih hloh hăm lơ hơnih viễn thông kơ Việt Nam. Kơdră teh đak lăng ‘lơ̆ng tơdrong dôm bơngai tơmơ̆t jên jang Trung Quốc hlôi tơlĕch jang hloh 4 rơbâu tơdrong jang oei iŏk yua tơ̆ Việt Nam hăm akŏp kơ sô̆ jên pơm hla ar hloh  26 ti đô la. Lơ̆m noh, ZTE hlôi đei măt tơ̆ Việt Nam đơ̆ng lơ sơnăm kơ âu. Kơdră teh đak lui ngeh, ZTE gô đei tơdrong jang hơdai kơjăp, đei yua hloh hăm dôm anih mơdro sa tơ̆ Việt Nam tơ̆ hơnăp kơnh; tơgop lơ̆m tơdrong hơtŏk tơiung atŭm đơ̆ng tơdrong pơvei jang hơdai Việt Nam – Trung Quốc.