Kơsơ̆ ‘năr 22/08, tơ̆ Anih jang kơ ƀok Kơdră tĕh đak, Kơdră tĕh đak bơ̆n ƀok Võ Văn Thưởng sơng yă Viengthong Siphandon, Bí thư Trung ương Đảng Kon pơlei Kăch mang Lào, Kơdră chĕp kơ̆l Anih tơm sek tơlang kơ tĕh đak Lào oei hơpong păng bơ̆ jang tơ̆ Việt Nam.

Kơdră tĕh đak Võ Văn Thưởng hơiă hăm yă Viengthong Siphandon păng Khul jang đơ̆ng Anih tơm sek tơlang kơ tĕh đak năm hơpong, bơ̆ jang hăm Anih tơm sek tơlang kơ tĕh đak Việt Nam; lui ‘măng năm hơpong gô hơmet kơjăp hlŏh dơ̆ng tơdrong pơvei jang hơdoi đơ̆ng 2 Anih tơm sek tơlang; atŭm hăm ‘nŏh vang tơgop hơmet pơ ‘lơ̆ng tơdrong pơvei kăp gĭt, jang hơdoi tôm tơdrong đơ̆ng Việt Nam – Lào.

Roi tơbăt hăm Kơdră tĕh đak găh tơdrong pơma đam hăm Kơdră chĕp kơ̆l Anih tơm sek tơlang Việt Nam Nguyễn Hòa Bình, yă Viengthong Siphandon ăn tơbăt, 2 păh pơma nuh găh dôm tơdrong kăl, trong vă jang hơdoi; drơ̆ng nơ̆r hơnơ̆ng chĕp vei, pơm hơtŏk tơdrong jơnei đơ̆ng “Sơnăm Tơguăt mĭnh ƀơ̆r đon, jang tơbôl ‘lơ̆ng hơiă Việt Nam - Lào, Lào - Việt Nam”. 2 păh oei drơ̆ng nơ̆r hơnơ̆ng pơm hơtŏk tơdrong juăt ‘lơ̆ng hơiă lơ̆m tơdrong pơvei gĭt kăl Việt – Lào mă rim jơhnơr chĕp kơ̆l kơ 2 tĕh đak hơnơ̆ng hŭt jơhngâm tơiung pơjing.