Ƀok kơdră teh đak Võ Văn Thưởng hmach thơ thâu kơ yă Kơdră tang măt Oh Youngju chơt hơiă iŏk hơnăp jang ‘nao; lui ngeh yă Oh Youngju gô ling lang tơgŭm păng hơnơ̆ng tŭn pran tơdrong pơ vei jang hơdai gĭt kăl tôm tơdrong Việt Nam – Hàn Quốc tơ̆ hơnăp kơnh. Kơdră teh đak lăng ‘lơ̆ng yă Kơdră tang măt Oh Youngju jang đang ‘lơ̆ng hơnăp jang tơ̆ Việt Nam, đei dôm tơdrong tơgop gĭt kăl lơ̆m tơdrong pơtrŭt tơdrong pơvei 2 teh đak, mă loi ‘noh jĭ vang jang pơgơ̆r 2 tơdrong jang kăl: Kơdră teh đak Việt Nam năm ngôi tơ̆ Hàn Quốc hơtuch sơnăm 2022 păng ‘măng năm ngôi tơ̆ teh đak Việt Nam đơ̆ng Kơdră tơm teh đak Hàn Quốc ‘nao âu.

Tơ̆ jơ sơng, yă Kơdră tang măt Hàn Quốc Oh Youngju tơƀlŏk dơ̆ng nơ̆r krao hơvơn đơ̆ng ƀok Kơdră tơm teh đak Yoon Suk Yeol lơ̆m ‘măng tơƀơ̆p tơ̆ Hà Nội, hơvơn ƀok Kơdră teh đak Võ Văn Thưởng păng hơkăn ƀok jăh năm ngôi tơ̆ Hàn Quốc. Kơdră teh đak chơt hơiă drơ̆ng nơ̆r păng tơ băt, ‘măng năm ngôi gô đei hơmet lơ̆m khei ‘năr lăp.