Tơ̆ jơ tơƀâp, Kơdră teh đak tơchĕng ‘lơ̆ng dôm tơdrong iŏk đei đơ̆ng pơma đam kơplăh Phŏ Kơdră teh đak Võ Thị Ánh Xuân păng Phŏ Kơdră tơm Paul Mashatile. Kơdră teh đak pơma hơdăh Việt Nam năng kăl tơdrong pơvei yoa tơdrong jang hơdoi păng jang tŏk hăm Nam Phi, hơpơi ‘mĕh 2 păh hơnơ̆ng tưk hơtŏk tơdrong jang hơdoi, pơm pơ ‘lơ̆ng hlŏh dơ̆ng tơdrong pơvei lơ̆m rim tơdrong tơ̆ hơnăp kơnh.

Tơƀôh đon hơiă ‘măng mă blŭng truh hơpong tơ̆ Việt Nam păng châu Á, Phŏ Kơdră tơm Paul Mashatile akhan, Khul kơdră teh đak Nam Phi năng kăl păng ‘mĕh pơm hơtŏk tơdrong pơvei jang hơdoi lơ tơdrong hăm Việt Nam. Tơ̆ jơ tơƀâp, 2 păh drơ̆ng nơ̆r hơtŏk tơdrong tơƀâp, pơma nuh, ăn khul jang năm hơpong tơ̆ băl, mă loi hăm khul jang tih vă hơmet kơjăp hlŏh dơ̆ng đon lui chinh trĭ; tơgŭm băl tơ̆ rim Khul jang lơ pang, mă loi jĭ tơ̆ Liên hợp quốc, hơtŏk tơdrong jang hơdoi mŭk drăm, tĕch mơdro, tơmât jên jang, pơtho pơhrăm păng dôm tơdrong jang ‘nao nhen tơplih hăm kơmăy sô̆, jang mŭk drăm rơgŏh, pơvih ‘lơ̆ng ăn tơdrong jang tŏk mŭk drăm, tơpôl tơ̆ rim teh đak.