Kơdră teh đak pơma hơdăh, Việt Nam adrol dăh mă đơ̆ng rŏng nhen mĭnh, hơnơ̆ng năng kăl tơdrong pơvei ‘lơ̆ng hơiă đơ̆ng sơ̆ hăm Campuchia; hơiă mưh ƀôh tơdrong pơvei 2 teh đak roi đunh roi tŏk ‘lơ̆ng, đei yoa lơ̆m rim tơdrong. Kơdră teh đak Võ Văn Thưởng pơma hơdăh, Việt Nam ling lang chĕp răk tơdrong tơgŭm tôch ‘lơ̆ng đơ̆ng kon pơlei Campuchia lơ̆m dôm tơdrong tơblăh vei lăng Teh đak adrol sơ̆ kŭm nhen lơ̆m tơdrong jang tơiung pơjing păng tưk hơtŏk teh đak hrei ‘nâu.

Kŭm hăm tơdrong oei xa jê̆ băl, jŏh ayŏ kơdŏ xoang, kon pơlei 2 teh đak hơnơ̆ng yak hơdai hăm băl tang găn hơyăt, vang yak hlŏh kơ băt dôm tơdrong pơmat tat păng dang ei oei bơ̆ jang hơdai vă atŏk tơiung tơ̆ rim teh đak. Kơdră teh đak tơƀôh đon hơiă mưh ƀôh dôm kơdră chĕp kơ̆l Campuchia hơnơ̆ng ‘măng jơhngâm đon ‘lơ̆ng hăm Việt Nam, hơpơi ‘mĕh hơnơ̆ng chĕp vei dôm tơdrong ‘lơ̆ng đơ̆ng chăl chĕp kơ̆l hơdrol, pơm pơ ‘lơ̆ng hlŏh dơ̆ng tơdrong pơvei đơ̆ng sơ̆ kơ Việt Nam-Campuchia.