Tơ̆ jơ sơng, 2 ‘nu Kơdră chĕp kơ̆l lăp đon hăm tơdrong jang tŏk pran ‘lơ̆ng đơ̆ng tơdrong pơvei kơ 2 tĕh đak đơ̆ng rŏng 50 sơnăm pơjing tơdrong pơvei jang tơbôl, hơnhăk ăn tơdrong đei yoa tôch ‘lơ̆ng ăn kon pơlei 2 tĕh đak păng tơgop ‘lơ̆ng ăn tơdrong rơngei, hiôk hiam, sơđơ̆ng ‘lơ̆ng tơ̆ tơring păng lơ̆m apŭng plenh tĕh; drơ̆ng nơ̆r pơm hơtŏk hlŏh dơ̆ng đon lui băl găh chinh trĭ đơ̆ng 2 tĕh đak, năng ‘nâu jĭ tơdrong gĭt kăl ăn tơdrong jang atŏk tơiung tơdrong pơvei kơ 2 tĕh đak tŏk ‘lơ̆ng hlŏh dơ̆ng tơ̆ hơnăp kơnh.

Pơma nuh găh dôm tơdrong tơ̆ tơring păng lơ̆m apŭng plenh tĕh, 2 păh drơ̆ng nơ̆r hơnơ̆ng tơgŭm băl păng jang hơdoi kơjăp tơ̆ rim khul jang lơ pang lơ̆m tơring păng apŭng plenh tĕh, mă loi ‘nŏh tơ̆ Liên hợp quốc, APEC, ASEAN păng dôm trong jang hơdoi yoa ASEAN tơlĕh trong bơ̆ jang. Thủ tướng Australia pơma hơdăh đon tơchĕng đơ̆ng Australia găh tơdrong tơgŭm jang kiơ̆ luơ̆t apŭng plenh tĕh tơ̆ tơring păng sek tơlang dôm tơdrong tơgar băl tơ̆ đak dơsĭ Biển Đông kiơ̆ trong rơngei, lăp hăm luơ̆t apŭng plenh tĕh, mă loi jĭ UNCLOS 1982.