Truh dang ei, lơ̆m dêh char Vĩnh Long đei 16 rơbâu ‘nu linh lôch tang tĕh đak, 4.500 ‘nu linh rơka păng linh jĭ jăn, vă jê̆ 3.000 ‘nu Mĕ Việt Nam nuih mơng. Kơdră tĕh đak hơpơi ‘mĕh bơngai đei kŏng Vĩnh Long hơnơ̆ng tưk tơiung tơdrong juăt ‘lơ̆ng hơiă đơ̆ng pơlei đei tĕh sĭt kơtang, bơngai đei ang hơnhăk gơ̆h hơgei hơnơ̆ng tơgop ăn tơdrong jang tŏk đơ̆ng pơlei pơla Vĩnh Long kơtang nuih mơng.

Pơma tơ̆ jơ tơƀâp, Kơdră tĕh đak pôk pơ ư lơ bơngai đei kŏng păng unh hnam đe sư hlôi tŏk klăih đơ̆ng tơdrong jĭ jăn, pơmat tat, hơtŏk đon adrin lơ̆m tơdrong arih xa, pơjing tơdrong arih xa ‘lơ̆ng hơ iă tơ̆ tơring. Dôm bơngai tang măt mă đơ̆ng đĭ kră bơih, pă đei pran jăng bơih, mă lei oei hơnơ̆ng đei đon adrin tơgop ăn pơlei pơla, tĕh đak, pơtho pơhrăm, tơƀôh trong chong glung ăn jơhnơr mơ lôh. Kơdră tĕh đak hơpơi ‘mĕh, jơhngâm đon âu hơnơ̆ng đei vei kơjăp, tưk tơiung hăm đĭ đăng bơngai đei kŏng lơ̆m tĕh đak, vang tơgop pơjing pơlei pơla, tĕh đak roi đunh roi pơdrŏng ‘lơ̆ng rŏ.