Kơdră Thượng viện Italia chơt hơiă sơng ‘măng năm hơpong đơ̆ng Kơdră tĕh đak Võ Văn Thưởng păng Khul tang măt ăn tĕh đak Việt Nam; pơma hơdăh ‘nâu jĭ tơdrong pơma nuh ăn Khul jang chĕp kơ̆l tĕh đak mă blŭng đơ̆ng 2 tĕh đak lơ̆m 7 sơnăm âu ki, chih tơbăt khei ‘năr gĭt kăl lơ̆m tơdrong pơvei jang hơdoi 2 pang. 2 păh drơ̆ng nơ̆r jang hơdoi kơjăp, tơgŭm băl tơ̆ dôm hop akŏm nghị viện nhen Grŭp Nghị viện apŭng plenh tĕh (IPU) vă tơgop ăn tơdrong rơngei, jang hơdoi păng jang tŏk tơ̆ tơring păng lơ̆m apŭng plenh tĕh.

Lơ̆m tơdrong tơƀâp Kơdră Hạ viện Italia, Kơdră tĕh đak Võ Văn Thưởng athei hơtŏk tơdrong jang hơdoi đơ̆ng dôm anih chih pơjing luơ̆t kơ 2 tĕh đak, lơ̆m nŏh đei hơtŏk ăn khul năm hơpong tơ̆ băl; tơgŭm ăn tơdrong jang đơ̆ng Việt Nam pơm gơng tơƀưh hơtŏk tơdrong pơvei đơ̆ng Nghị viện Italia hăm Khul kơdră chĕp kơ̆l Grŭp Nghị viện ASEAN. Kơdră Hạ viện Italia tơroi, tơdrong Hạ viện Italia kĭ ăn tơdrong Tơchơ̆t tơgŭm vei lăng tơdrong tơmât jên jang Việt Nam – EU (EVIPA) ƀlep ƀât ‘măng năm hơpong đơ̆ng Kơdră tĕh đak vang tơgop pơjing tơdrong ‘lơ̆ng ăn tơdrong pơvei jang hơdoi đơ̆ng 2 păh.

Lơ̆m ‘măng năm ngôi, bơ̆jang âu mơ̆n, Kơdră teh đak Võ Văn Thưởng hlôi đei jơ tơƀơ̆p Kơdră vei lăng pơlei tơm Roma Roberto Gualtieri. Kơdră teh đak tơƀôh jơhngơ̆m đon hơiă truh năm ngôi tơ̆ Roma, pơlei tơm joh ayŏ, jơhnơr arih, kơ dŏ soang păng hnam, anih jang đe ư hơnhang hloh apŭng plĕnh teh; athei Kơdră vei lăng pơlei tơm Roma păng khŭl kơdră chĕp kơ̆l pơlei tơm pơtrŭt tŭn pran jang hơdai đơ̆ng tơring Lazio păng Roma hăm Hà Nội, tơgop pơm ‘lơ̆ng hloh jang hơdai lơ tơdrong đơ̆ng 2 teh đak. Kơdră teh đak athei 2 păh hơtŏk loi dơ̆ng jang hơdai pơgơ̆r dôm tơdrong jang hơdai lơ̆m tơdrong jang joh ayŏ so vă hơtŏk loi dơ̆ng tơƀơ̆p pơma dơnuh, roi tơƀôh joh ayŏ 2 teh đak, 2 pơlei tơm, kiơ̆ đơ̆ng noh pơtrŭt tơƀơ̆p pơma dơnuh kon pơlei păng hlôh băt dih băl.