Tơ̆ jơ tơƀâp, Kơdră tĕh đak Võ Văn Thưởng pơma hơdăh Việt Nam ling lang năng kăl tơdrong pơvei Việt-Lào ‘nŏh jĭ tơmam tôch kăp gĭt, jĭ tơdrong pơvei tôch ‘lơ̆ng, 1 jơhngâm đon, tơpăt ‘lơ̆ng, ưh đei tơ̆ yơ lơ̆m apŭng plenh tĕh đei. 2 ‘nu kơdră chĕp kơ̆l drơ̆ng nơ̆r hơnơ̆ng vei kơjăp dôm tơdrong đei yoa đơ̆ng chă pơgơ̆r jŏh ayŏ kơ dŏ xoang, tơplŏng kơdâu păng chă tơmang lăng; bơ̆ jang ‘lơ̆ng Tơdrong jang hơtŏk tơdrong đei yoa đơ̆ng jang hơdoi Việt Nam-Lào lơ̆m tơdrong pơtho pơhrăm păng atŏk tơiung khul bơngai jang đơ̆ng 2021-2030.

Tổng Bí thư – Kơdră tĕh đak Thongloun Sisoulith ăn tơbăt Lào tôch năng kăl tơdrong pơvei hăm Việt Nam, hơnơ̆ng adrin vă tưk tơiung păng hơnhăk tơdrong pơvei ‘lơ̆ng hơiă tôch kăp gĭt păng jang hơdoi tôm tơdrong Việt- Lào tŏk pran kơjăp, roi đunh roi ‘lơ̆ng, roi đei yoa; pơma hơdăh vă hơnơ̆ng tơgop ăn tơdrong pơm hơtŏk tơdrong pơvei đơ̆ng 2 Đảng, 2 tĕh đak. Ƀlêp ƀât ‘măng mă âu mơ̆n, Kơdră tĕh đak Võ Văn Thưởng păng Khul tang măt ăn Việt Nam đei jơ tơƀâp đe kăn ƀô̆, bơngai jang tơ̆ dôm anih tang măt ăn Việt Nam tơ̆ Trung Quốc.