Tơ̆ jơ tơƀơ̆p muh măt Tang măt kơdră chĕp kơ̆l Đảng, teh đak, Kơdră teh đak Võ Văn Thưởng tơƀôh jơhngơ̆m chơt hơiă tơƀơ̆p muh măt khŭl tang măt bơngai đei kŏng dêh char Trà Vinh, tơƀôh jơhngơ̆m đon băt bơnê gĭt kăl  hăm dôm jơhnơr năm hơdrol găh dôm tơdrong plang jơhngơ̆m tih tên lơ̆m tơdrong jang rơngei hơdrĕch hơdrŭng, rơngei teh đak.

Pơma hơdah, Đảng, teh đak ling lang hơdrin bơngơ̆t truh, vei lăng bơngai đei kŏng, Kơdră teh đak athei rim kơdră, anih jang, Đảng bộ, khŭl kơdră dêh char Trà Vinh hơnơ̆ng bơ̆jang kiơ̆ jơnei, ‘lơ̆ng tơdrong jang tơgŭm đơ̆ng teh đak hăm tơdrong jang ‘nâu; hơnơ̆ng dăr hơlen vă hoei lon bơngai đei kŏng hăm kach mang mă tam mă đei sa jên tơgŭm đơ̆ng Teh đak, mă lei kŭm ‘nĕ kơ lê̆ tơdrong jang tơgŭm ưh kơ ƀlep bơngai. Kơdră teh đak pơma hơdăh, tơdrong bơ̆jang kiơ̆ ‘lơ̆ng tơdrong jang tơgŭm bơngai đei kŏng tơ̆ Trà Vinh kŭm jing 1 trong jang vă hơtŏk grŭp tơgoăt tơgoăl đĭ đăng hơdrĕch hơdrŭng, mă loi ‘noh jĭ tơ̆ Trà Vinh đei lơ kon pơlei kon kông plang jơhngơ̆m ăn kach mạng.