Ƀlep ƀơ̆t tơbăt Năr bơngai mơdro sa Việt Nam, 13/10, yak truh tơbăt 9 sơnăm năr pơjing Khŭl drŏ kăn mơdro sa Việt Nam 19/10 păng năr drŏ kăn Việt Nam 20/10, kơsơ̆ 5/10, tơ̆ Anih jang kơdră teh đak, ƀok Kơdră teh đak Võ Văn Thưởng tơƀơ̆p muh măt Khŭl 90 drŏ kăn mơdro sa ‘lơ̆ng kơ Khŭl drŏ kăn mơdro sa Việt Nam. Pơma hơdăh Đảng, teh đak ling lang bơngơ̆t truh, pơm tơdrong hiôk ăn tơdrong hơtŏk tơiung tih pran đơ̆ng khŭl mơdro sa Việt Nam, lơ̆m noh đei drŏ kăn mơdro sa, Kơdră teh đak ‘meh vă Khŭl drŏ kăn mơdro sa Việt Nam ling lang ‘noh jĭ hơnih rong ‘me, pơlung tơdrong hơ pơi ‘meh pơm pơdrŏng trŏ ƀlep đơ̆ng bơngai drŏ kăn, đơ̆ng drŏ kăn mơdro sa Việt Nam; mă loi ‘noh jĭ tơƀôh tơdrong hơiă pran kơtang găh tơdrong hơdrin yak tŏk, pơtrŭt đe buăl mơ lôh pơm pơdrŏng trŏ ƀlep.

Hăm kơ sô̆ drŏ kăn teh đak bơ̆n đei 50% kơ sô̆ kon pơlei păng vă jê̆ 50% bơngai jang ‘noh drŏ kăn, Kơdră teh đak akhan, kơ sô̆ 8.000 ‘nu drŏ kăn mơdro sa vang jang lơ̆m Khŭl mơdro sa drŏ kăn tam mă tơroi đĭ tơdrong pran đơ̆ng drŏ kăn mơdro sa Việt Nam. Yua thoi noh, Kơdră teh đak ‘meh vă Khŭl jang pơih să bơngai jang să jơ̆p 63 dêh char, pơlei tơm. Ƀok Võ Văn Thưởng kŭm athei dôm drŏ kăn mơdro sa hơnơ̆ng tơgop nơ̆r kăt tơ jur dôm hla ar hành chính lơ, pơm hơnih tơmơ̆t jên jang hiôk ƀiơ̆; tơgop pơjing dôm trong jang tơgŭm hơtŏk tơiung teh đak.