Kơdră teh đak hlôi năm ngôi păng pơma dơnuh hăm kang ƀô̆, bơngai jang lơ̆m Anih jang tang măt Việt Nam, kon pơlei đơ̆ng teh đak bơ̆n tŏk bŏk arih sa, bơ̆jang păng hŏk pơhrăm tơ̆ Italia. Dang ei đei dang 5000 ‘nu Việt Nam arih sa tơ̆ Italia, đei anih dơ̆ng ƀlep khôi luơ̆t sơđơ̆ng, ling lang 1 jơhngơ̆m đon, tơklep hơdai păng đei teh đak âu lăng ‘lơ̆ng. Kơdră teh đak kŭm ‘meh vă kon pơlei Việt Nam oei tơ̆ Italia vei kơjăp tơdrong joh ayŏ joăt joe kơ bơngai Việt.

Hơnơ̆ng hơtŏk tơdrong joăt joe 1 jơhngơ̆m đon, tơgŭm băl lơ̆m tơdrong arih sa, pơm kiơ̆ ‘lơ̆ng khôi luơ̆t teh đak ‘nâu. Lăng ‘lơ̆ng dôm bơngai hŏk jrŭ, bơngai jang khoa hŏk, bơngai mơdro sa, anih jang teh đak đe ‘măn jơ năr tơchĕng hơlen, roi tơƀôh joh ayŏ Việt Nam, Kơdră teh đak akhan, ‘noh jĭ tơdrong tôch kơ lăng kăl. Tang măt Đảng, teh đak, Kơdră teh đak Võ Văn Thưởng bơnê kơ dôm bôl buăl Italia joăt hăm Việt Nam hlôi bơngơ̆t truh tơgŭm Việt Nam lơ̆m prăt dôm sơnăm âu ki.