Iung pơma tơ̆ jơ tơƀơ̆p hăm bơngai tăh hla, Kơdră teh đak Võ Văn Thưởng roi tơbăt găh tơdrong teh đak sơnăm 2023, sơnăm đei lăng jĭ sơnăm kăl lơ̆m bơ̆jang kiơ̆ Tơdrong tơchơ̆t Hop akŏm XIII kơ Đảng kŭm nhen sơnăm kăl đơ̆ng bơ̆jang kiơ̆ hơnăp jang hơtŏk tơiung mŭk drăm tơpôl 5 sơnăm. Mă đơ̆ng tơdrong mŭk drăm tơring păng apŭng plĕnh teh đei ƀôh mơmat tat ưh kơ ê, đei tơdrong kơ tĕch trong jang pơtruh ăn, mă lei hăm tơdrong hơdrin đơ̆ng đĭ đăng Đảng, đĭ đăng kon pơlei, đĭ đăng lĭnh, teh đak iŏk đei lơ jơnei gĭt kăl, jĭ tơdrong hơiă ‘lơ̆ng hơdăh.

Găh 1,2 tơdrong nai bơngai tăh hla bơngơ̆t truh, Kơdră teh đak tơbăt, Pơlei tơm Đà Nẵng hlôi hơdrin hơmet pơ ‘lơ̆ng dôm nơ̆r apĭnh đơ̆ng bơngai tăh hla khei ‘năr âu ki. Mă lei đei 1,2 tơdrong ưh khan lăp pơlei tơm hơmet pơ ‘lơ̆ng gơh mă kăl kơ jang hơdai hăm dôm anih jang Trung ương kŭm nhen jang pơkeh trong jang tơgŭm.