Tơ̆ hơnih vei răk tơbăt, tơ̆ hơnăp rup bơngai nuih mơng hơdrĕch hơdrŭng, bơngai joh ayŏ Nguyễn Trãi, Kơdră teh đak kŭm hăm khŭl tang măt hlôi soh plang nhang, ƀlŏk hơdơ̆r kŏng jang tih tên Ức Trai ‘lơ̆ng rŏ, mĭnh ‘nu bơngai joh ayŏ gơh hơgei, mĭnh ‘nu bơngai đei đon tơchĕng yak hloh chăl arih, mĭnh ‘nu bơngai chĭnh trĭ, tơdrong jang khŭl lĭnh, jang tơbôl tôch kơ hơgei.

Tơ̆ âu, Kơdră teh đak kŭm truh akŏm pơm lêh pơih blŭng ăn tơdrong chih pơcheh ƀơ̆t ƀlŭng pơyan puih mak hăm hơnăn:  Anih tơm Hà Nội: "joh ayŏ joăt joe - hơgei - ‘nao” păng bơ̆jang kiơ̆ tơdrong joăt pơih blŭng ăn tơdrong chih pơcheh ƀơ̆t blŭng pơyan puih mak. Tơdrong pơih blŭng ăn tơdrong chih pơcheh ƀơ̆t blŭng pơyan puih mak đơ̆ng sơ̆ đĭ đei pơvei nhen 1 tơdrong ‘lơ̆ng hơiă joh ayŏ joăt joe kơ bơngai Việt. Dôm chư chih blŭng a kơ sơnăm đa pơtruh ‘meh vă găh dôm tơdrong ‘lơ̆ng hơiă, pŭn ai, hiôk hian, tơƀôh tơdrong joăt joe băt yom, nhă đak ƀlŏk kơ tu đơ̆ng hơdrĕch hơdrŭng Việt Nam, tŭn pran tơdrong jang pơtrŭt hŏk, pơtrŭt hơgei, tơgop hơtŏk jơhngơ̆m đon pơnam kơ hŏk, pơjing đon gơh hơgei kon bơngai Việt Nam.