Tơ̆ tơring Tây Nguyên, vă jê̆ 1 triu 400 rơbâu ‘nu hŏk tro rim jăl chơt hơiă năm tơ̆ hnam trưng pơm lêh mât hŏk sơnăm hŏk ‘nao. Lơ̆m nŏh, dêh char Dak Lak đei 500 rơbâu ‘nu hŏk tro, Gia Lai đei 368 rơbâu ‘nu hŏk tro, Lâm Đồng đei 334 rơbâu ‘nu hŏk tro, Dak Nông đei 185 rơbâu ‘nu hŏk tro păng Kon Tum đei 166 rơbâu ‘nu hŏk tro. Kăl loi, thây kô păng hŏk tro tơ̆ Hnam trưng tĕh đak rong hŏk tro kon kông dêh char Gia Lai chơt hơiă sơng Kơdră tĕh đak bơ̆n ƀok Võ Văn Thưởng truh pơm lêh mât blŭng sơnăm hŏk ‘nao.

Kơdră tĕh đak pơma hơdăh: “Đơ̆ng hnam trưng ‘mêm kơ eng âu, rơbâu ‘nu hŏk tro kon hơ ‘lơ̆p bơngai Bahnar, Jrai, Thái, Nùng, Tày, Rađe, Xơ Đăng… đei hŏk pơhrăm truh um, vang tơgop pơjing đei khul bơngai jang rơgei pơyoa ăn tơdrong jang atŏk tơiung mŭk drăm, tơpôl, vei lăng sơđơ̆ng tĕh đak tơ̆ dêh char. Lơ̆m kơsô̆ ‘nŏh, lơ hŏk tro đơ̆ng hnam trưng âu jing kăn ƀô̆ chĕp kơ̆l lơ̆m dêh char.

Ƀlep ƀât ‘măng mă âu, Kơdră tơm vei lăng pơtho pơhrăm Nguyễn Kim Sơn đei jơ bơ̆ jang hăm Anih vei lăng pơtho pơhrăm dêh char Gia Lai. Tơ̆ âu, ƀok Nguyễn Kim Sơn athei anih pơtho pơhrăm dêh char tơrĕk truh tơdrong tơplih ‘nao tơdrong pơtho pơhrăm, năng kăl, pơjing tơdrong ‘lơ̆ng vă khul thây kô lơ̆m dêh char sơđơ̆ng jơhngâm, hưch hanh hăm tơdrong pơtho pơhrăm phô thŏng ‘nao. 

Pơgê 5/9, ƀok Nguyễn Trọng Nghĩa, Kơdră Ban Tuyên giáo Trung ương hlôi truh vang pơm lêh et hơtŏk hơnih đak rơgoh tơ̆ cù lao Tân Phú Đông, dêh char Tiền Giang. Ƀok Nguyễn Trọng Nghĩa tơtă kơ kang ƀô̆, thây kô pơtho păng hŏk tro dêh char Tiền Giang pơma atŭm păng hnam trưng hŏk jăl 2 Tân Phú pơma hơdrô̆ kăl hơnơ̆ng hơtŏk ‘lơ̆ng tơdrong jang pơtho păng hŏk, tơgop lơ̆m tơdrong jang pơjing bơngai, pơtho pơhrăm bơngai hơgei ăn teh đak.

Dôm kơdră đảng, kơdră tơring kăl pơm kiơ̆ đon tơchĕng, trong jang găh pơtho pơhrăm đơ̆ng Đảng- teh đak, păng nơ̆r pơtho đơ̆ng Ƀok Hồ ‘mêm kơ eng, hơnơ̆ng bơngơ̆t truh, pơm tơdrong hiôk ‘lơ̆ng ăn tơdrong jang pơtho pơhrăm; kăl kơ tơmơ̆t hơdai pơtho chư hăm pơtho jơhngơ̆m đon ‘lơ̆ng, pơtho tơdrong joăt joe ‘mêm kơ teh đak.