Pơma tơ̆ jơ pơm lêh, Kơdră teh đak Võ Văn Thưởng tơƀlŏk dơ̆ng tơdrong joăt joe jơhnơr arih ang hơdăh đơ̆ng tơring teh, kon bơngai Quảng Ninh, jĭ hơnih blŭng Teh đak; hơnih đei đak krong Bạch Đằng, chih tơƀôh jơhnơr nuih mơng đơ̆ng hơdrĕch hơdrŭng hăm 3 ‘măng tơblăh jơnei ayăt mơ̆t tơgar. Kơdră teh đak lăng ‘lơ̆ng Đảng bộ, khŭl kơdră păng kon pơlei dêh char Quảng Ninh khei ‘năr âu ki hơnơ̆ng hơtŏk ‘lơ̆ng tơdrong joăt joe 1 jơhngơ̆m đon, hơdrin kơdih, hơbĕch hơbal, pơcheh hơgei, iŏk đei lơ jơnei tih tên.

Mŭk drăm hơtŏk tơiung pran, tŏk (GRDP) lơ păng sơđơ̆ng, tơtil 8 sơnăm hloi, đơ̆ng sơnăm 2016 tă kơ tŏk hloh 10%; thu mong jên jang teh đak ling lang oei lơ̆m grŭp chông hơdrol lơ̆m teh đak. Quảng Ninh hlôi pơjing tơdrong jang pơjing tơring tơrang ‘nao tơ̆ pơđĭ 3 jăl; jang đang hơdrol 3 sơnăm tơdrong jang tơm teh đak tơjur dơnuh hin kơjăp jăl jang 2021 - 2025. Tơdrong jang pơjing, hơmet ming Đảng păng tơdrong chĭnh trĭ ling lang đei lăng kăl, đei lơ tơplih ‘nao.