Ăh jơ xơng, Kơdră teh đak bơ̆n Võ Văn Thưởng xơkơ̆t hơdăh, Việt Nam hơnơ̆ng lăng tơgĭt tơdrong jang tơbôl kăp gĭt hăm Liên bang Nga, lăng âu jing teh đak jang hadoi kăp gĭt hloh. Việt Nam hơpơi 'meh hơtŏk jang hadoi Việt - Nga roi năr roi kơhret păng tơnăp hloh, pơm trŏ tơdrong pơyua kăp gĭt kơ 2 hơdrung hơdrĕch, kơyuơ tơdrong rơngei, xơđơ̆ng păng hơtŏk tơ-iung tơ̆ tơring păng lơ̆m kơpal teh.

Hmach bơnê kơ tơdrong jang hadoi 'lơ̆ng rŏ đơ̆ng Anih jang xek tơlang kơ 2 teh đak, ƀok Kơdră teh đak bơ̆n Võ Văn Thưởng drơ̆ng nơ̆r tơdrong mă 2 anih jang pơtoi pơtruh khul kơdră kơpal pơma dơnuh dih băl; jang hadoi lơ̆m tơdrong juăt jang; pơtoi xơkơ̆t hơdăh tơdrong đei jơnei jang hadoi rim xơnăm păng chih akŏm dôm tơdrong jang hadoi 'nao roi kơhret păng đei jơnei hloh. Kơdră teh đak bơ̆n lui ngeh lơ̆m khei năr truh, anih jang Xek tơlang kơ 2 teh đak gô pơtoi hơtŏk jang hadoi kơjăp hloh; tơgop kăp gĭt lơ̆m tơdrong hơtŏk tơ-iung kơ rim teh đak, adoi nhen kơhret kơjăp jang tơbôl juăt jue kơ 2 teh đak.