Tơ̆ jơ sơng, Kơdră tơdăng kơ teh đak bơ̆n Võ Thị Ánh Xuân bơnê kơ Anih mong jên Apŭng plenh teh hlôi đei tơgop tih tên lơ̆m tơdrong tơgŭm hơtŏk tơdrong hơrih ăn kon pơlei tơ̆ dôm teh đak vang jang lơ̆m apŭng plenh teh. Hăm Việt Nam Anih mong jên Apŭng plenh teh jing minh lơ̆m 3 anih jang hơtŏk tơ-iung, asong jên tŏk iŏk teh đak đe tih hloh, asong pơhlom 35% jên tŏk iŏk đơ̆ng teh đak đe kơ Việt Nam.

Kơdră tơdăng kơ teh đak bơ̆n bơnê kơ tơdrong tơgŭm kăp gĭt đơ̆ng yă Carolyn Turk păng Anih mong jên Apŭng plenh teh asong ăn Việt Nam, lơ̆m noh đei lơ tơdrong jang kăp gĭt nhen: pơdui khei năr kla hre hăm dôm kơsô̆ jên tŏk iŏk; Hlôi đei tơdrong tơgŭm ăn Việt Nam tang găn păng tơjră jĭ Covid-19, tơgŭm Việt Nam tenh kuăng hơmet mŭk drăm đơ̆ng rŏng kơ pơrang jĭ. Mă kăl, Anih mong jên Apŭng plenh teh hlôi pơkăp hơvơn đei pơhlom 1-2 tih đôlar minh sơnăm asong jang hơtŏk tơ-iung kơ Việt Nam lơ̆m pơm kiơ̆ dôm tơdrong jang kăp gĭt. Lơ̆m khei năr truh, Kơdră tơdăng kơ teh đak bơ̆n pơkăl Anih mong jên Apŭng plenh teh pơtoi jang hadoi kơjăp, tơgŭm Việt Nam lơ̆m tơdrong jang hơtŏk teh đak.