Khei ‘năr âu ki, tơdrong pơvei 2 pang Việt Nam - Indonesia hơnơ̆ng tŏk pran ‘lơng. ‘Măng năm hơpong truh âu kơnh gô jing ‘măng mă 2 Kơdră tơm Joko Widodo năm ngôi tơ̆ teh đak Việt Nam (đơ̆ng rŏng ‘măng năm hơpong ƀât khei 9/2018) păng jing jơnăr vă 2 păh hơnơ̆ng pơma nuh găh dôm trong jang vă hơtŏk tơdrong jang hơdoi, pơm pơ ‘lơ̆ng hlŏh dơ̆ng tơdrong Pơvei, jang hơdoi gĭt kăl, kiơ̆ đơ̆ng noh hơmet kơjăp tơdrong pơvei ‘lơ̆ng hơiă đơ̆ng sơ̆, hlôi đei pơjing păng chĕp vei văjê̆ 70 sơnăm âu ki.

Dang ei 2 teh đak oei đei lơ tơdrong ‘lơ̆ng vă iŏk yoa, hơmet kơjăp tơdrong pơvei jang hơdoi mă ‘lơ̆ng hlŏh dơ̆ng đơ̆ng Việt Nam păng Indonesia, pơjing tơdrong ‘lơ̆ng hlŏh vă 2 teh đak pơm hơtŏk tơdrong pơvei 2 pang, tơgăl hăm tơdrong pran ‘lơ̆ng đơ̆ng rim teh đak kŭm nhen tơdrong jang tŏk tôch ‘lơ̆ng đơ̆ng tơdrong pơvei 2 pang khei ‘năr âu ki.