Tơ̆ hop akŏm, Ƀok Kơdră Bùi Thanh Sơn pơma hơdăh Việt Nam ling lang hơpơi ‘mĕh pơm hơtŏk tơdrong pơvei păng jang hơdoi lơ tơdrong hăm Ireland; lui kiơ̆ đơ̆ng ‘măng năm hơpong gô kŭm hăm Ireland hơlen năng, drơ̆ng nơ̆r hăm dôm trong jang tih gĭt kăl vă pơm hơtŏk tơdrong pơvei 2 pang tŏk ‘lơ̆ng tôm tơdrong, lăp hăm tơdrong ‘mĕh vă păng tơdrong đei yoa đơ̆ng kon pơlei 2 teh đak.

Kơdră tơm Michael D. Higgins, pơma hơdăh Ireland gô pơjing tơdrong ‘lơ̆ng vă tơpôl bơngai Việt mât hơdai păng hŏk pơhrăm sơđơ̆ng ‘lơ̆ng, hơnơ̆ng pơm gơng tơƀưh ăn tơdrong pơvei đơ̆ng 2 teh đak. 2 ‘nu kơdră chĕp kơ̆l drơng nơ̆r găh tơdrong 2 teh đak hơtŏk tơdrong jang hơdoi păng tơgŭm băl tơ̆ dôm hop akŏm lơpang, sek tơlang dôm tơdrong tơblăh, tơgar băl kiơ̆ trong rơngei, lăp hăm Khôi luơ̆t tơm kơ Liên hợp quốc păng luơ̆t apŭng plenh teh.