Sơng iŏk nơ̆r krao đơ̆ng Kơdră tĕh đak bơ̆n ƀok Võ Văn Thưởng, năr ‘nâu, 21/8, Kơdră tơm tĕh đak Kazakhstan Kassym-Jomart Tokayev pơtơm năm hơpong tơ̆ tĕh đak Việt Nam. ‘Nâu jĭ ‘măng năm hơpong mă blŭng đơ̆ng Kơdră tơm Kassym-Jomart Tokayev truh tơ̆ Việt Nam hăm kơchư̆k jang ‘nao, kŭm jing ‘măng năm hơpong mă blŭng đơ̆ng 1 ‘nu Kơdră tơm tĕh đak Kazakhstan lơ̆m 12 sơnăm âu ki, tôch gĭt kăl vă pơm hơtŏk hlŏh dơ̆ng tơdrong pơvei jang hơdoi ‘lơ̆ng hơiă đơ̆ng Việt Nam- Kazakhstan, mă loi găh mŭk drăm, tĕch mơdro.

Lơ̆m ‘măng năm hơpong âu, 2 păh vă kĭ hlŏh 10 tơdrong drơ̆ng nơ̆r, lơ̆m nŏh athei jô̆ truh Trong jang hơdoi vă hơtŏk tơdrong jang hơdoi mŭk drăm, tĕch mơdro. Kŭm hăm ‘nŏh jĭ tơdrong drơ̆ng nơ̆r găh tơdrong ưh kăl pơm hla ar mât lĕch ăn kon pơlei 2 tĕh đak. Pơgê 20/8, Kơdră tơm tĕh đak Kazakhstan Kassym-Jomart Tokayev truh ming kơvang pơkao tơ̆ Anih man rup ƀlơ̆k hơdơ̆r kơ đe linh lôch tang tĕh đak păng ming kơvang pơkao ƀlơ̆k hơdơ̆r tơ̆ Pơsat Ƀok Hô. Đơ̆ng rŏng kơ lêh sơng tơ̆ Anih jang kơ Ƀok Kơdră tĕh đak, Kơdră tĕh đak bơ̆n ƀok Võ Văn Thưởng păng Kơdră tơm Kassym-Jomart Tokayev pơgơ̆r pơma đam.