Lăp đơ̆ng rŏng kơ pơm lêh sơng, Kơdră tơm Tô Lâm kŭm hăm Kơdră Anih tơm Nội vụ Liên bang Nga pơgơ̆r pơma đam. Kơdră tơm Tô Lâm pơma hơdăh, tơdrong pơvei jang hơdai đơ̆ng Anih tơm vei lăng Kŏng an Việt Nam păng Anih tơm Nội vụ Liên bang Nga đei dôm hơyak hơtŏk tơiung ‘lơ̆ng lơ̆m dôm tơdrong jang. Tơ̆ ‘măng pơma đam, 2 păh hlôi drơ̆ng nơ̆r gô tơlĕch jang đei yua “Tơdrong jang hơdai bơ̆jang đơ̆ng Anih tơm vei lăng Kŏng an Việt Nam păng Anih tơm Nội vụ Liên bang Nga jăl jang 2022 - 2024” kĭ lơ̆m khei 5/2022; hơnơ̆ng tơroi băl kơtơ̆ng ang  pơm glăi, dăr hơlen, sek phak dôm tơdrong ƀơm truh 2 pang.

2 pang tơchĕng hơlen tơdrong vă pơjing trong jang hơdai lơ̆m tơdrong jang vei lăng tơgŭm bơngai mơdro sa, hŏk tro hŏk oei kơtă păng kon pơlei đơ̆ng teh đak ‘nâu bơ̆jang, hŏk pơhrăm păng jang sa arih sa tơ̆ teh đak to, vei sơđơ̆ng tơdrong pơm tơm, đei yua trŏ ƀlep đơ̆ng kon pơlei 2 teh đak, kŭm nhen kơchăng tang găn dôm tơdrong jang pơm yoch, pơm glăi khôi luơ̆t, pơm pơrăm ăn tơdrong sơđơ̆ng teh đak kơ Việt Nam păng Liên bang Nga.