Ƀok Kơdră Tô Lâm păng khul jang truh ngôi, pơlung unh hnam đe linh lôch tang tĕh đak, đei: Thiếu tá Hoàng Trung (rơnĕh sơnăm 1981), Đại úy Nguyễn Đăng Nhân (rơnĕh sơnăm 1994) jĭ kăn ƀô̆ Công an xăh Ea Ktur; Thiếu tá Trần Quốc Thắng (rơnĕh sơnăm 1989) păng Đại úy Hà Tuấn Anh (rơnĕh sơnăm 1991), kăn ƀô̆ Công an xăh Ea Tiêu; Bí thư Đảng, Kơdră Jơnŭm pơgơ̆r kon pơlei xăh Ea Ktur Nguyễn Văn Kiên păng Kơdră vei lăng kon pơlei xăh Ea Tiêu Nguyễn Văn Dũng.

Tơ̆ hnam đe linh lôch tang tĕh đak, Ƀok Kơdră Tô Lâm păng khul jang sŏh hlôt nhang, ƀlŏk hơdơ̆r kơ đe bôl boăl, đe kăn ƀô̆ hlôi lôch tang nuih mơng yoa tơdrong rơngei, hiôk sơđơ̆ng kơ kon pơlei. Tơƀôh jơhngâm đon ơ̆h hơdai hăm dôm unh hnam kăn ƀô̆, linh găh tơdrong lôch răm âu, Ƀok Kơdră Tô Lâm pơma hơdăh, Đảng, tĕh đak, Anih tơm vei lăng Công an ling lang tơrĕk, bơ̆ jang ‘lơ̆ng tơdrong tơgŭm hăm kăn ƀô̆ Công an lôch tang. Ƀok Kơdră Tô Lâm athei dôm anih jang kơpal kơ dêh char Dak Lak tơrĕk tơgŭm găh tơmam drăm, jơhngâm đon hăm dôm unh hnam linh lôch tang tĕh đak. Ưh gơ̆h lê̆ kơtum kơtŏng ‘nhŏng ŏh, unh hnam linh lôch tang tĕh đak chĭu pŭ tơdrong răm.

Ƀlep ƀât năm ngôi, pơma nuh hăm unh hnam đe linh lôch tang ăn tĕh đak, ƀok Kơdră Tô Lâm hơpăh jên đei 500 triu vă man hnam ăn 2 unh hnam linh lôch tang tĕh đak ‘nŏh jĭ Thiếu tá Hoàng Trung păng Thiếu tá Trần Quốc Thắng; pơjao hla ar mong jên đei kơjă 500 triu ăn unh hnam linh lôch tang tĕh đak Nguyễn Đăng Nhân păng Hà Tuấn Anh; pơjao 50 triu hlak jên ăn dôm unh hnam linh lôch tang tĕh đak, đei iŏk đơ̆ng Anih mong jên tang găn tơdrong yoch kơ Trung ương.