Kơsơ̆ 4/6, Quốc hội hơnơ̆ng pơgơ̆r Apinh jet păng tơl nơ̆r apinh jet găh dôm tơdrong jang kơmăy, tĕch mơdro. Dôm bơngai tang măt Quốc hội athei Kơdră tơm vei lăng jang kơmăy, tĕch mơdro Nguyễn Hồng Diên pơm hơdăh dôm trong jang vă găn ƀiơ̆ tơdrong pơm glăi năm truh tơdrong pơjing trong tĕch mơdro hăm điên tư, dôm tơdrong tơgŭm păng hơmet pơ ‘lơ̆ng pơmat tat ăn anih tĕch mơdro, tưk tơiung ming dơ̆ng tơdrong jang xa. Ƀok Kơdră Nguyễn Hồng Diên ăn tơbăt: dôm sơnăm âu ki, tơdrong tĕch mơdro hăm điên tư tơ̆ Việt Nam tŏk pran, jô̆ păh lăp tŏk đơ̆ng 20- 25% 1 sơnăm, Việt Nam đei dơ̆ng lơ̆m grŭp 5 teh đak jang tŏk hrĕnh hlŏh lơ̆m apŭng plenh teh; tơdrong tĕch mơdro hăm điên tư iŏk đei hlŏh 20 ti đô la Mi.

Ƀok Kơdră ăn tơbăt hlôi năng kăl, tơlĕch jang hrơ̆ch ‘lơ̆ng dôm trong jang pơm hơtŏk tơdrong đei yoa mưh vei lăng năng tông tơdrong đei yoa ăn bơngai răt kŭm nhen hơmet pơ ‘lơ̆ng trong tơgŭm, hơtŏk tơdrong dăr lăng, pơjing trong sơng iŏk păng tơl tơblang ăn bơngai răt tơmam, plĕh hŭt dôm tơdrong tĕch tơmam glăi luơ̆t lơ̆m kơmăy sô̆. Găh vei lăng tơdrong tĕch tơmam lơ̆m mang tơpôl, Anih tơm vei lăng jang kơmăy, tĕch mơdro jang hơdoi hăm dôm anih jang đei ƀơm truh hơlen năng păng set tơlang; iŏk yoa khul bơngai vei lăng tĕch mơdro vă chă ƀôh, tang găn, pơm hơdăh dôm tơdrong pơm glăi.