Lơ̆m ‘măng năm hơpong tơ̆ tĕh đak Ấn Độ, Đại tướng Phan Văn Giang, Kơdră jang lơ̆m Anih tơm Chinh trĭ, Phŏ Bí thư Quân ủy Trung ương, Kơdră tơm vei lăng khul linh tĕh đak chĕp kơ̆l khul tang măt gĭt kăl đơ̆ng Anih tơm vei lăng khul linh tĕh đak Việt Nam truh tơƀâp, pơma nuh hăm Kơdră tơm tĕh đak Ấn Độ yă Droupali Murmu tơ̆ Anih tơm New Delhi.

Pơma tơ̆ jơ tơƀâp, Ƀok Kơdră Phan Văn Giang pơma hơdăh, Việt Nam ling lang năng kăl tơdrong hơmet kơjăp păng atŏk tơiung tơdrong pơvei ‘lơ̆ng hơiă đơ̆ng sơ̆, jang hơdoi gĭt kăl tôm tơdrong hăm Ấn Độ hlôi đei Ƀok Hô păng Thủ tướng Jawaharlal Nehru pơjing păng đei rim jơhnơr kơdră chĕp kơ̆l, kon pơlei 2 tĕh đak hŭt jơhngâm hơmet pơ ‘lơ̆ng.

Kơdră tơm Ấn Độ pơma hơdăh, ‘măng năm hơpong gô hơmet kơjăp hlŏh dơ̆ng tơdrong pơvei jang hơdoi gĭt kăl tôm tơdrong đơ̆ng 2 tĕh đak. Tơchĕng ‘lơ̆ng tơdrong iŏk đei lơ̆m jơ pơma đam đơ̆ng 2 ‘nu Kơdră tơm vei lăng khul linh 2 tĕh đak, Kơdră tơm Ấn Độ pơma hơdăh tơdrong pơvei đơ̆ng khul linh 2 pang hơnơ̆ng tŏk pran ‘lơ̆ng, jang hơdoi roi đei yoa, tơgop gĭt kăl ăn tơdrong pơvei jang hơdoi đơ̆ng 2 tĕh đak.